Жылдан жылға ауданымыздағы қылмыстың саны көбейіп келе жатқанын талдау көрсетіп берді. Әсіресе, соңғы кездері қылмыскерлер ақша иемдену үшін жаңадан неше түрлі әдістер ойлап тапты. Алайда, тіркелген қылмыстардың қазіргі таңда үшеуі сотқа жолданып, қылмыскерлер тиісті жазасын алды.
Мысалға айтқанда жыл басында аудан тұрғыны «К» есімді адам жұмысқа тұрғызу мақсатында аудан тұрғынының сеніміне кіру арқылы алдап, ақшасын иемденіп алған. Қазіргі таңда осы тектес тағы үш жайт анықталу үстінде.
Тағы бір мысал, 2018 жылдың 27 ақпаны күні белгісіз адамдар «А» есімді азаматтың Құлан ауылында үйін жарнама арқылы сатуға қойғанын біліп, телефонына қоңырау шалады. Үйді сатып алатындарын және алдын ала төлем жасайтындарын айтып, жалған ақпарат берген олар үй иесінің банкомат шотының нөмірін алдап біліп алады. Нәтижесінде қылмыскерлер үйін сатқысы келіп жүрген «А» есімді азаматтың есеп шотында болған 100 мың теңгесін иемденіп алған.
Аталған жайт бойынша аудандық ішкі істер бөлімі ҚР ҚК-тің 190-бабының 2-бөлігінің 4-тармағымен, яғни (ақпараттық жүйені пайдаланушыны алдау немесе сенімін теріс пайдалану жолымен жасалған алаяқтық) сотқа дейінгі тергеп-тексеру амалдары басталды. Қазақстан Республикасының Қылмыстық кодекстің 190-бабы – алаяқтық, яғни бөтеннің мүлкін жымқыру немесе алдау немесе сенімді теріс пайдалану жолымен бөтен мүлiкке құқықты иемдену қылмысының ең жоғарғы жазасы – мүлкi тәркiленiп, белгілі бір лауазымдарды атқару немесе белгілі бір қызметпен айналысу құқығынан өмір бойына айыра отырып, он жылға дейiнгi мерзiмге бас бостандығынан айыруға жазалануды көздейді.
Сондықтан да, аталған жағдайларға ұшырамау мақсатында алаяқтардан абай болуларыңызды және ондай жайттар орын алған жағдайда дереу полицияға хабар берулеріңізді сұраймыз.
Ғ.ЖАКУПОВ,
Т.Рысқұлов ауданы прокуратурасының аға прокуроры.
