Тараз қаласы білім бөлімінің жоспарына сәйкес ұйымдастырылған шара «Еңбек және көгалдандыру жасақтары, үйірмелер жұмысы» тақырыбын қамтыды. Оған мектеп жанындағы лагерь тәрбиеленушілері қатысты.
Іс-шара барысында балаларға табиғатты қорғаудың маңызы, тазалық сақтау мәдениеті, қоқысты сұрыптау және тұрмыстық қалдықтарды дұрыс жинау жолдары түсіндірілді. Оқушылар мектеп ауласындағы тазалық жұмыстарына атсалысып, қоқыстарды жинап, қоршаған ортаның тазалығына өз үлестерін қосты.
Мектептің аға тәрбиешісі Гүлнұр Скендровна Жидебаеваның айтуынша, мұндай шаралар балаларды еңбекке баулып қана қоймай, олардың табиғатқа деген жауапкершілігін арттырады.
— Біздің мектепте оқушылардың тәрбиесіне, бос уақытын тиімді ұйымдастыруға ерекше көңіл бөлінеді. Балалармен экологиялық бағыттағы шаралар жиі өткізіледі. Оларға табиғатты аялау, тазалық сақтау, қоқысты сұрыптау сияқты қарапайым, бірақ өте маңызды дағдыларды үйретеміз. Себебі экологиялық мәдениет бала кезден қалыптасуы керек. Бүгінгі шарада балалардың белсенділігі жоғары болды. Олар мектеп ауласын тазалап, өз еңбектері арқылы ортақ іске үлес қоса алатынын көрсетті, — деді аға тәрбиеші.
Сонымен қатар мектепте жазғы лагерь аясында балалардың шығармашылық қабілетін дамытуға, еңбекке баулуға, салауатты өмір салтын насихаттауға бағытталған түрлі іс-шаралар тұрақты түрде ұйымдастырылып келеді.
Айта кетейік, Мемлекет басшысының бастамасымен қолға алынған «Таза Қазақстан» республикалық экологиялық акциясы аясында №2 орта мектепте де тазалық, көгалдандыру және қоршаған ортаны қорғау бағытындағы жұмыстар жалғасуда. Мұндай бастамалар жас ұрпақтың туған жерге сүйіспеншілігін арттырып, табиғатқа қамқор көзқарасын қалыптастыруға ықпал етеді.
