Жамбыл облысының Байзақ ауданы Құмжота ауылындағы Ыбырай Алтынсарин атындағы орта мектеп асханасында анықталған сапасыз азық-түлік қоғамда резонанс тудырды. Даулы жағдай Облыстық ата-аналар комитетінің төрайымы Назима Жұбандықова жариялаған бейнежазбадан кейін белгілі болды.
4 мамырға арналған мектеп мәзіріндегі қырыққабаттың көгеріп, жағымсыз иіс шығара бастағаны көрсетілген видео әлеуметтік желіде қызу талқыланып, ата-аналар алаңдаушылығын күшейтті. Осыдан кейін мәселе жедел түрде бақылауға алынды.
Бүгін ҚР Мәдениет және ақпарат саласындағы Қоғамдық кеңес мүшесі Исламбек Дастан мектепке арнайы барып, асханадағы жағдаймен танысты. Мектеп директоры Қанатбек Бәйтен бұл дерек бойынша бірден акт толтырылғанын мәлімдеді. Құжатқа мектеп басшылығы, медицина қызметкері, шаруашылық меңгерушісі, әлеуметтік педагог, ата-аналар және аспаз қол қойған.
Сонымен қатар, білім ордасында тамақ сапасын бақылау үшін арнайы бракераждық комиссия құрылған.
Аспаз Анар Сағымбайқызы өнімдердің жеткізілуіне қатысты түсініктеме берді. Оның айтуынша, көкөністерді Қапбаров жеке кәсіпкері жексенбі күні жеткізген. Қабылдау кезінде сапа талапқа сай болғанымен, келесі күні түскі уақытта қырыққабаттың бұзыла бастағаны және жағымсыз иіс шыққаны анықталған. Мектеп әкімшілігі бұл өнімнің ас әзірлеуге пайдаланылмағанын айтып отыр.
Кездесу барысында белсенді Исламбек Дастан бұған дейін Киікбаев атындағы мектеп орын алған балалардың жаппай улану жағдайын еске салып, мұндай оқиғалардан сабақ алу керектігін қатаң ескертті. Оның айтуынша, сапасыз өнім – балалар денсаулығына тікелей қауіп.
Мемлекеттік сатып алу порталында оқушыларды тамақтандыру бойынша «Қапбаров Разақ» жеке кәсіпкері Байзақ ауданы бойынша 38,4 млн теңге келісімшарта тұрған болса, Байзақ ауданы мектептеріне тамақтандыру бойынша №16446802-1 конкурс нәтижесі бойынша 38,8 млн теңгеге конкурс жеңімпазы атанған.
Қазіргі таңда аталған мектепте 350 оқушы тегін ыстық тамақпен қамтылған. Сондықтан ата-аналар мен қоғам тарапынан бақылау күшейіп отыр. Мектеп әкімшілігі жеткізушілермен жұмысты қатаңдатып, асхана жағдайын күнделікті бақылауға алатынын мәлімдеді.
