Байзақ ауданы әкімдігі тарапынан ағымдағы жылдың есепті мерзімінде мемлекеттік бағдарламаларды орындау бойынша жоспарлы жұмыстар атқарып, ауданның негізгі әлеуметтік — экономикалық көрсеткіштеріне тұрақты түрде талдау жұмыстары жүргізіліп, белгіленген индикаторлық көрсеткіштерге, сондай-ақ серпінді даму көрсеткіштеріне қол жеткізу мақсатында тиісті жұмыстар жүргізілуде. Атқарылған жұмыстардың нәтижесінде ауданның әлеуметтік — экономикалық көрсеткіштері өткен жылдың тиісті кезеңінен және орташа облыстық деңгейден жоғары қалыптасты. Сауда, өнеркәсіп, ауыл шаруашылығы, инвестиция, құрылыс, тұрғын үй, салықтық түсім, жалақы, бюджет кірісі артқан. Атап айтқанда, өнеркәсіп өнімінің көлемі өткен жылдың тиісті кезеңімен салыстырғанда 100,2% құраған.
Ағымдағы жылдың қаңтар-маусым айларында өнеркәсіп өнімін өндіру көлемі 2,9 млрд. теңгені құрап, нақты көлем индексі – 2020 жылдың сәйкес кезеңіне 100,2%. 2020 жылдың тиісті кезеңімен салыстырғанда өңдеу өнеркәсібінде – 0,7%-ға, электрмен жабдықтау, газ, бу беру және ауаны баптауда – 15,8%-ға, сумен жабдықтау, кәріз жүйесі, қалдықтардың жиналуын және таратылуын бақылауда 84,5%-ға өссе, кен өндіру өнеркәсібі және карьерлерді қазуда 45,7%-ға төмендеуі байқалады. Үдемелі индустриялық-инновациялық даму мемлекеттік бағдарламасы (ҮИИД) аясында «Алель Агро» АҚ Жамбыл облысында «Ет құс шаруашылығын дамыту» жобасы жүзеге асырылуда. Шағын және орта кәсіпкерлік саласында жұмыс істейтін субъектілерінің саны 6664 бірлікті немесе 2020 жылдың тиісті кезеңіне 101,5%-ды құрады. Оларда жұмыспен қамтылғандар – 9233 адам, барлық белсенді халықтағы үлесі 17,9 % құрайды. Аудан бойынша «Бизнестің жол картасы-2025» бизнесті қолдау мен дамытудың мемлекеттік бағдарламасы аясында 2021 жылдың 6 айында құны 1,4 млрд. теңге құрайтын 76 жоба қаржыландырылды. Инфрақұрылымды дамыту тетігі бойынша 2020 жылы «Каз Экофрукт» ЖШС алма бағына 102,5 млн. теңгеге, «СПК Вита-фрут-Тараз» ЖШС алма бағына 96,0 млн. теңгеге инфрақұрылымды өткізу бойынша құжаттары министрліктің шешімі шығып, қазіргі таңда аудан әкімдігінің тұрғын үй-коммуналдық шаруашылық, жолаушылар көлігі және автомобиль жолдары бөлімі мен энергетика басқармасы бірлесіп жұмыс атқаруда. ЖК «Омарова» жоба құны 2,9 млн. теңгеге инфрақұрылымды өткізу бойынша құжаттары облыстық басқармалардың және Аймақтық үйлестіру комиссиясының оң шешімімен мақұлданып, қазіргі таңда қаржыландыру күтілуде. «Қарапайым заттар экономикасы» бағдарламасы бойынша 2021 жылы 10 жоба мақұлданып, жалпы құны 935,2 млн. теңгені құрайды. Оның ішінде 673,2 млн теңгеге 9 жоба қаржыландырылған. Негізгі капиталға инвестициялар 11,6 млрд. теңгені немесе 2020 жылдың сәйкес кезеңіне 102,8% құраған. Инвестиция құрылымындағы негізгі үлесті меншікті қаражат құрайды 72,6% немесе 8,4 млрд. теңге, қалған 27,4%-ы бюджеттік және басқа да қарыз қаражаттар болып табылады. Байзақ ауданы бойынша 2021-2025 жылдар аралығында жалпы көлемі 66 млрд. 735,0 млн теңгені құрайтын 14 инвестициялық жобаларды іске асыру жоспарлануда. Жоба бойынша 1492 адам жұмыспен қамтылатын болады. Құны 64 млрд. 235,0 млн теңгені құрайтын 8 инвестициялық жоба Қазақстан Республикасының «2020-2025 жылдарға арналған индустриалды-инновациялық даму» мемлекеттік бағдарламасы аясында Жамбыл облысының Индустриаландыру картасына енгізілген. Осы жобалар аясында 1332 жаңа жұмыс орындары ашылады деп жоспарлануда.
Материал Жамбыл облысы әкімдігінің ішкі саясат басқармасының тапсырысы бойынша дайындалды
