Бүгін Қаратау қаласында Жамбыл облыстық Қоғамдық кеңесінің «ҚР Бас Прокуратурасы мен Ішкі істер министрлігінің бірлескен «Мал ұрлығына тосқауыл» жобасының Жамбыл облысының аудандарында орындалуының қазіргі жәй-күйі және оны алдын алудың өзекті мәселелері» туралы Қоғамдық талқылау басталды. Талқылауға облыстық және аудандық Қоғамдық кеңес мүшелері, полиция департаментінің өкілдері, мүдделі мекеме басшылары, аудан тұрғындары қатысуда.
— «Бұқаралық ақпарат құралдарының және бас прокуратураның мәліметінше елімізде 2015-2017 жылдар аралығында мал ұрлығына қатысты 21802 дерек тіркелген, олардың тек 38,4 пайызы ғана ашылған. Сотқа жіберілген қылмыстық істер-14 пайыз ғана. Мал иелеріне келген зиян 3,5 млрд теңгені құраған және оның 48 пайызының ғана орны толтырылған. Жамбыл облысында жүргізілген қоғамдық мониторинг көрсеткендей жергілікті атқарушы, құқық қорғау органдары мал ұрлығының алдын алу, жедел профилактикалық іс-шаралардың арқасында 2018 жылдың жеті айында мал ұрлығы көрсеткіші 47 пайызға төмендеген. Жыл басынан бері 185 мал ұрлығы тіркелген, өткен жылғы осы кезеңде 349 факт орын алған болатын» — деп баяндады облыстық Қоғамдық кеңестің комиссия төрағасы Қасымхан Төлендиев.
2018 жылдың 7 айында облыс бойынша 656 бас мал ұрланған, жоғалған. Олардың 141 жылқы, 175 ірі қара және 340 ұсақ мал басы. Ұрланған жоғалған малдың көбі түнгі жайылымда иесіз қалған кезде орын алған. Демек, мал ұрлығы мал жайылымда қараусыз қалған кезде жиі орын алады екен. Жасыратыны жоқ, кейбір мал иелері әсіресе жылқыларын, ірі қара малын апталап, айлап алыстағы жайылымға қараусыз бос жіберіп қояды. Ондай жағдайда әрине малы жоғалады, қасқырларға жем болады, не ұрланады.
TURANINFO.KZ
