Т.Рысқұлов аудандық орталық ауруханасына бағасы 188 млн теңгені құрайтын жаңа мультиспиральді компьютерлік томограф uCT530, сатып алынды. Оның басты ерекшелігі — арнайы бағдарламаның көмегімен адам ағзасының барлық бөлімдеріне зерттеу жүргізетіндігінде.
Сипаттамасы бойынша түтіктің максималды айналу жылдамдығы — 0,75 сек/360°, генератордың баламалы қуаты — 103 кВт/сек. Үстелге максималды жүктеме — 205 кг. Аппературасы — 70 см.
Құрылғы өкпенің, бауырдың, ұйқы безінің қатерлі ісіктерін, іш қуысының патологиясын, көкбауырдың, бүйректің, бауырдың жарақаттарын, қан тамырлары мен қан ағымының жағдайын, мидағы артериялардың қан кетуін немесе кеңеюін, сүйектердің зақымдануында дәл диагноз қоюға және ауруларды ерте сатысында анықтауға мүмкіндік береді. Сондай-ақ, осы аппаратта қажет болған жағдайда контрасты тексеру мүмкіндігі де қарастырылған. Өйткені кейде зерттеуді жүргізу кезінде сау және патологиялық өзгерген тіндердің контрастын күшейту қажет болады. Көп жағдайда процедура қатерлі ісікке күдік туындаған кезде немесе қатерлі ісікті саралау үшін ұсынылады. Контрастты КТ-ның басты артықшылығы — қабыну процестерін, кисталарды, қан ұйығыштарын, ісіктерді ерте диагностикалау.
Компьютерлік томография жасау кезінде рентген суреттері бүкіл денедегі бұрыштарды толық қамтиды. Нәтижелер қуатты компьютердің көмегімен өңделеді. Бұл жағдайда жаңа құрылғы виртуализациямен 40 тілім шығарады. Зерттеудің жоғары өнімділігі мен нәтиженің дәлдігінің арқасында суреттерді сапалы түрде визуализациялауға және деректерді мұрағаттауға болады.
Мұндай аппараттан өту үшін арнайы дайындықтың қажеті жоқ. Тек, сырға, сақина, белдік сынды темірден жасалған бұйымдарды шешіп, пациент шалқасынан құрылғыға жатқызылады. Аппарат 10-15 секундтың ішінде сканерлеп, ауру себептерін анықтау үшін компьютер бетіне адам ағзасын түсіріп береді. Тексеру жұмыстары ешқандай ауыртпалықсыз жасалады.
Сәулелік диагностика бойынша арнайы оқытылған мамандар мен жаңа заманауи құрылғының бағдарламалық жасақтамасы пациенттердің үлкен ағымымен жылдам, әрі тиімді жұмыс істеуге мүмкіндік береді.
2021 жылдың 27 желтоқсаны күні барлығы 15 адам тексеруге жіберілді, тексеру қорытындысы науқастың ем-шара қабылдау кезінде өз нәтижесін берді.
Медициналық қызметтің бұл түрі міндетті әлеуметтік-медициналық сақтандыру аясында тегін және ақылы негізде көрсетіледі. Ал инсульт, жарақат алу т.б. шұғыл жағдайларда зерттеулер тәулік бойы азаматтардың сақтандыру мәртебесіне қарамай жасалатын болады.
Денсаулық сақтау басқармасының
баспасөз қызметі
