Халықаралық отбасы күніне орай Әлихан Бөкейханов атындағы №1 гимназияда үйірмелердің ашық есік күні жоғары деңгейде ұйымдастырылды. Тағылымы мол шараға ата-аналар мен қонақтар қатысып, гимназиядағы үйірме жұмыстарының нәтижелерімен танысты, сондай-ақ оқушылардың шығармашылық және спорттық жетістіктерін тамашалады.
Ашық есік күні барысында оқушылар өз өнерлері мен қабілеттерін көпшілік назарына ұсынып, түрлі шеберлік сағаттарын, көрмелер мен мазмұнды таныстырылымдар өткізді. Әр үйірменің жұмысы ерекше дайындықпен көрсетіліп, балалардың ізденісі мен таланты көпшіліктің ыстық ықыласына бөленді.
Шараға қатысқан ата-аналар белсенділік танытып, балалардың жетістіктеріне қуанышпен қолдау білдірді. Сонымен қатар үйірме жетекшілерімен пікір алмасып, гимназиядағы қосымша білім беру бағытындағы жұмыстарға жоғары бағаларын берді.
2025–2026 оқу жылында гимназияда түрлі бағыттағы 68 үйірме мен спорттық секция жұмыс жасауда. Оның ішінде 20 спорттық секция, 24 шығармашылық және 24 пәндік үйірме бар. Бүгінде бұл үйірмелер мен секцияларға 2460 оқушы қатысып, гимназия білім алушыларының 89 пайызын қамтып отыр.
Осындай мазмұнды шаралар отбасы мен мектеп арасындағы ынтымақтастықты нығайтып қана қоймай, оқушылардың жан-жақты дамуына қолдау көрсетудің маңызын айқындай түседі.
