Ғимараттардың жылу жүйесін реттеу, жарықтың үздіксіз берілуін қадағалау және ауланы ретке келтіру сияқты маңызды міндеттерді осы техникалық қызметкерлер өз иығымен көтеріп келеді. Осындай жауапты істің басы-қасында жүрген жандардың бірі – Рақымжан Әлмаханов. Бүгінде ол Талас аудандық білім бөлімінде оператор-сантехник ретінде қызмет атқарады. Кезінде Қаратау қаласындағы кәсіптік лицейде «Электрик» мамандығын меңгерген ол, бұл сала бойынша Астана, Алматы секілді ірі қалаларда еңбек етіп, тәжірибе жинақтаған. Ол тіпті бас қаламыз Астанадағы зәулім нысандардың бой көтеруіне де өзіндік үлесін қосқанын мақтанышпен еске алады. Дегенмен 2014 жылы отбасылық жағдайына байланысты туған өлкесіне оралып, балалар ауруханасына оператор-сантехник болып жұмысқа тұрады. Кейіннен бұл ғимарат аудандық білім бөлімінің иелігіне өткенде де Рақымжан өзінің байырғы жұмыс орнында қалып, еңбегін жалғастыра береді.
Өз ісінің майталманы осы ғимаратта тапжылмай жұмыс істеп келе жатқанына 12 жыл толыпты. Рақымжан Ибаділдаұлы бұрын екі қабатты мекемені көмірмен жылытқан кездерін, ал қазір газ жүйесіне көшкендіктен жұмыстың едәуір жеңілдеп, ауыр бейнеттен құтылғандарын айтады. Алайда көгілдір отынның жауапкершілігі де оңай емес: жылу ошағының маңындағы термометрлерді үнемі тексеріп, газ қысымын қадағалап, электр қуатының сөніп қалмауын бақылау – басты міндет. Қыс па, жаз ба, жыл бойы мекеменің таза суы мен жылу желісін, есік-терезесі мен электр жүйесін өз бақылауында ұстайтын ол, кез келген ақауды өз қолымен жөндеп шығатын әмбебап маман. Мекеменің шаруашылық меңгерушісі Қайрат Байжігітов те Рақымжанның өз ісіне өте тиянақты екенін, негізгі мамандығы электрик болғандықтан жарық пен жылудан ешқашан мәселе туындамайтынын және оның ұжым арасында сыйлы, өте еңбекқор жан екенін жеткізді.
Рақымжан тек қызметте ғана емес, отбасында да үлгілі отағасы. Жұбайы Ақмарал екеуі қара шаңырақтың түтінін түтетіп, бес бала тәрбиелеп, қарт анасына күтім жасап отыр. Еңбекқорлығының арқасында білім бөлімі мен аудандық кәсіподақ комитеті тарапынан талай марапаттарға ие болып, шипажайлар мен туристік саяхаттарға жолдама алса да, ол үнемі жұмыста немесе үйде бақша шаруашылығымен айналысқанды жаны сүйетінін айтады. «Қолым бос отырғанды ұнатпаймын, балаларымды да кішкентайынан еңбекке баулып келемін. Еңбек еткен адамның жүзі қашанда жарық. Табатын табысым аз болса да, барға қанағат етіп, шүкіршілік етемін», – дейді Рақымжан Ибаділдаұлы өз сөзінде.
Ақпарат Жамбыл облысы әкімдігі ақпарат және қоғамдық даму басқармасы мемлекеттік ақпараттық саясат тапсырысы негізінде жарияланды
