ҚР Сыбайлас жемқорлыққа қарсы іс-қимыл агенттігінің Жамбыл облысы бойынша Департаменті басшысының орынбасары Ернар Мақажанов, сондай-ақ Превенция басқармасының басшылығы Дәурен Омаров пен сыбайлас жемқорлыққа қарсы комиссар Ербол Бақтыхожаевтан құралған жұмыс тобы сыбайлас жемқорлық құқық бұзушылықтардың алдын алу мақсатында Меркі ауданында болып қайтты.
Аудан әкімі Жорабек Баубеков, сондай-ақ мемлекеттік және құқық қорғау органдары басшыларының қатысуымен өткен жиында сыбайлас жемқорлықтың алдын алу және қоғамда парасаттылыө мәдениетін қалыптастыру бойынша жұмыс нәтижелері тыңдалды.
«Бүгінгі күні ең осал салаларда сыбайлас жемқорлыққа қарсы профилактикалық шаралардың рөлі бұрынғыдан да жоғары екені сөзсіз. Сыбайлас жемқорлыққа қарсы қызметімен жемқорлыққа барынша бейім салаларды анықтау мақсатында жүйелі түрде мониторинг жүргізіледі, сыбайлас жемқорлық тәуекелдерін жою бойынша ұсыныстар беріледі. Біз қазір №4 Үлгілі базалық бағытын «Сыбайлас жемқорлықтың алдын алу және оған қарсы іс-қимыл» іске асыру мақсатында жобаларды басқару тетіктерін қолданумен белсенді жұмыс істеп жатырмыз. Осы орайда аудан әкімдігі алға қойылған міндеттердің сапалы орындалуын қамтамасыз етуі қажет»,– деп атап өтті Ернар Мақажанов.
Мақажанов өз сөзінде аудан әкімінің назарын кәсіпкерлікті қорғау шараларына, атап айтқанда, мемлекеттік қызметтерді жүзеге асыру барысында, бақылау және рұқсат беру функцияларын жүзеге асыру кезінде бизнес пен мемлекеттің өзара әрекеттесу механизміне аударды.
Өз кезегінде Дәурен Омаров квазимемлекеттік сектор субъектілерінің комплаенс -қызметтерімен, полиция және салық бақылау органдарының, медициналық және білім беру мекемелерінің ұжымдарымен сыбайлас жемқорлыққа қарсы іс-қимыл саласындағы заңнамадағы соңғы өзгерістерді, Сыбайлас жемқорлыққа қарсы саясат тұжырымдамасының негізгі міндеттерін хабардар ету мақсатында бірқатар кездесулер өткізді.
Сондай-ақ, сыбайлас жемқорлық құқық бұзушылық жасағаны үшін қылмыстық және әкімшілік жауапкершілік шаралары, олардың туындау себептеріне тоқталып, бірнеше мысалдар келтірді.
Сыбайлас жемқорлық тәуекелдерін жою, құқық бұзушылықтар мен қылмыстардың, сондай-ақ орын алған сыбайлас жемқорлық фактілерінің алдын алу мақсатында кез келген азамат тәулік бойы жұмыс істейтін 1424 Call-орталығы арқылы сыбайлас жемқорлыққа қарсы қызметке хабарлай алатынын айтты.
