Жаңадан құрылған «Әділет» саяси партиясының ашық дауыс беру қорытындысы бойынша облыстық филиалдың басшысы болып Каипов Даурен Айтасұлы сайланды. Ол мемлекеттік және қоғамдық-саяси қызмет саласында көпжылдық тәжірибеге ие. Жаңа қызметінде ол облыстық филиалдың жұмысын үйлестіріп, партияның бағдарламалық мақсаттарын жүзеге асыруға және азаматтармен өзара іс-қимылды ұйымдастыруға жетекшілік етеді.
Айта кетейік, «Әділет» партиясы 2026 жылы Қазақстанда ресми тіркелген жаңа саяси партиялардың бірі. Партияның құрылтай съезінде төраға болып Айбек Дәдебай сайланған болатын. Партия өзін конституциялық құндылықтарды, заң үстемдігін және «Әділетті Қазақстан» қағидаттарын қолдайтын саяси ұйым ретінде таныстырады.
Даурен Айтасұлы, 1985 жылы Жуалы ауданында туылған. Қызметтік мансабын облыстық «Жастар орталығы» директоры, Сарысу ауданы әкімі аппаратының басшысы, Мемлекеттік қызмет істері Агенттігі Жамбыл облысы департамент басшысының орынбасары, соңғы кездері кәсіпкерлікпен айналысып келген.
«Әділет» партиясының Жамбыл облыстық филиалында конференция өтті. Оның қорытындысы бойынша филиал басшысы, Саяси кеңес мүшелері және Бақылау-тексеру комиссиясының құрамы сайланды.
Күн тәртібіндегі негізгі мәселелердің бірі – Қазақстан Республикасының Президенті Қасым-Жомарт Тоқаевтың «Жаңа Конституция – Жаңа Дәуір» атты үндеуіне қолдау көрсету. Сондай-ақ қатысушылар партияның облыстық филиалының басшылық құрамын жасақтау мәселесін қарады.
Саяси кеңес құрамына шағын және орта бизнес, білім беру, ғылым, денсаулық сақтау, мәдениет, спорт, өнеркәсіп, үкіметтік емес сектор, бұқаралық ақпарат құралдары және өңір экономикасы мен қоғамдық өмірінің түрлі салаларын таныстыратын өзге де бағыттардың өкілдері енді.
Бақылау-тексеру комиссиясының құрамына экономика, қаржы, бухгалтерлік есеп, құқықтану және басқа да кәсіби бағыттар бойынша тәжірибесі бар мамандар енді.
Басшылық құрамның жасақталуы «Әділет» партиясының облыстық филиалын құру жұмысының ұйымдастырушылық кезеңін түйіндеді. Алдағы уақытта филиал өңір тұрғындарымен жүйелі жұмыс жүргізу, партиялық бастамаларды жүзеге асыру, сарапшылар қоғамдастығымен, кәсіпкерлермен және қоғамдық бірлестіктермен өзара байланысты нығайту ісіне кіріседі.
