Осы бағытта нақты істермен көзге түсіп, қоғамда ашықтық пен жауапкершілік мәдениетін насихаттап жүрген ұйымдардың бірі – «Адал Қоғам» қоғамдық бірлестігі. Ұйым басшысы – Еркебұлан Ержанұлы.
Бірлестік қызметінің басты мақсаты – қоғамда сыбайлас жемқорлыққа қарсы мәдениетті қалыптастыру, ашықтық пен әділеттілік қағидаттарын кеңінен тарату арқылы азаматтардың мемлекеттік құрылымдарға деген сенімін арттыру. Бұл бағытта «Адал Қоғам» тек насихатпен шектелмей, нақты жобалар арқылы жүйелі жұмыс жүргізіп келеді.
2020 жылдан бері ұйым 19 жоба жүзеге асырды, олардың барлығы дерлік сыбайлас жемқорлықтың алдын алу, қоғамдық бақылауды күшейту және азаматтардың құқықтық сауаттылығын арттыру секілді өзекті мәселелерге бағытталған. Жобалар барысында білім беру, денсаулық сақтау, мемлекеттік қызмет көрсету салаларындағы ашықтықты қамтамасыз ету тетіктері пысықталып, тұрғындармен тікелей кездесу форматында түсіндіру жұмыстары жүргізілді.
2020–2023 жылдар аралығында бірлестік «Жамбыл – Адалдық алаңы» жобасына белсене қатысып, мемлекеттік мекемелер мен жергілікті атқарушы органдарда тұрмыстық жемқорлықты жою, адалдық стандарттарын енгізу бағытында нақты ұсыныстар мен талдаулар ұсынды. Бұл жоба Жамбыл өңіріндегі қоғамдық бақылау тетіктерінің дамуына серпін беріп, жергілікті тұрғындардың белсенділігін арттырды.
2022–2023 жылдары жүзеге асырылған «Межведомственная группа общественной безопасности» жобасы аясында бірлестік құқық қорғау органдары, мемлекеттік мекемелер және ҮЕҰ өкілдерімен бірлесе отырып, қоғамдық қауіпсіздік пен парасаттылық қағидаттарын насихаттауға бағытталған шаралар ұйымдастырды. Бұл бағытта жасалған жұмыстардың нәтижесінде қоғамдағы құқықтық мәдениеттің деңгейі мен азаматтардың ақпараттануы едәуір артты.
2023 жылдан бастап «Адал Қоғам» бірлестігі «Типовое базовое направление 4» бағыты аясында үкіметтік жобаларды іске асыруға қатысып келеді. Бұл бағыт қоғамда әлеуметтік әділеттілікке негізделген, заманауи және тиімді мемлекеттік басқару жүйесін құруға арналған бастамаларды қамтиды. Ұйым түрлі тренингтер, талқылау алаңдары мен түсіндіру кездесулері арқылы қоғамдық сананы жаңғыртуға үлес қосып отыр.
«Адал Қоғам» – атына заты сай ұйым. Оның басты ұстанымы – тазалық, әділет және сенім. Бірлестік алдағы уақытта да жемқорлыққа қарсы күрес саласында жаңа жобаларды іске асырып, адалдықты өмір салтына айналдырған қоғам құру жолындағы қызметін жалғастыра бермек.
