Мемлекет басшысы Қасым-Жомарт Тоқаев парламент палаталарының бірлескен отырысында «Жаңа жағдайдағы Қазақстан: іс-қимыл кезеңі» атты Жолдауын жариялады.
Жаңа леппен жаңа Жолдау жария болды. Ел келешегі үшін айқын талаптар алға қойылды. Әр жүйенің тасын өрге домалату жолында ел Президенті сала басшыларына нықтап тапсырма берді. Әлеуметтің әлеуетін жақсартуда экономикаға да, медицинаға да, басқаға да оң бағытта өзгеріп, іс- қимыл кезеңін дамыту керектігі айтылды. Жолдауда көрсетілген мәселелер жерде қалмай, кезең-кезеңмен орындалмақ. Оның жан-жақты бастамалары, әсіресе, әлеуметтік саланы дамытуға бағыттаған жоспарлары — адам жанына араша болып жүрген абзал жандардың көңілінен шықты.
Елімізде коронавирус фактілері едәуір азайғанымен, бұл бағыттағы жұмыстар, әлбетте, бәсеңдемеуі шарт. Пандемиядан туындаған дағдарыс дәрігерлердің жұмысын бағалауды үйретті. Сол үшін де дәрігер мамандығының маңыздылығы материалдық жағынан да күшейтілуі керек деп ескере келе, мемлекет басшысы жақын арада бюджетті нақтылау кезінде медицина қызметкерлеріне екінші жартыжылдықта ынталандыру үстемақыларын төлеуге 150 миллиард теңге бөлуді тапсырды.
«2023 жылға қарай дәрігерлердің жалақысы экономикадағы орташа жалақыдан екі есе артық болады» — деді Президент.
Мемлекет басшысы Қасым-Жомарт Тоқаев медициналық инфрақұрылымды дамыту жұмысы жайлы да баяндады.
«Тағы бір мәселе – медициналық инфрақұрылымды дамыту. Жыл соңына дейін ел аумағында 13 жаңа жұқпалы аурулар ауруханасы салынады. Ал 2025 жылға қарай денсаулық сақтау саласына арналған 20 заманауи көпсалалы нысан пайдалануға беріледі. Бұл осы мақсатқа орай 1,5 трлн теңгеге жуық инвестиция тартылады деген сөз» деп атап өтті Мемлекет басшысы Жолдау барысында. Оның айтуынша, Елбасының бастамасымен Нұр-Сұлтан және Алматы қалаларында екі көпсалалы медициналық орталық
салынады. «Бұл орталықтар еліміздің бетке ұстар мекемелеріне айналып, инновациялық өсімге және қолданбалы медицинаның дамуына тың серпін береді», — деді Қ. Тоқаев.
Президенттің айтуы бойынша, Үкімет бастапқы медициналық көмекті ұйымдастыру тәсілдерін қайта қарауы қажет. Ол барынша мобильді, әрі халықтың барлық тобына, оның ішінде ауыл тұрғындарына қолжетімді
болуы керек. Шалғай өңірлерде көліктік медицинаны жаңғырту жөнінде шаралар қабылдау қажет. Сонымен бірге, мемлекет басшысы үш жыл ішінде барлық ауылдық елді мекендерді фельдшерлік-акушерлік пунктілермен және дәрігерлік амбулаториямен қамтамасыз етуді тапсырды.
Ұлттық денсаулық сақтауды одан әрі дамыту жөніндегі шаралар барлық медициналық ұйымдарды қажетті жабдықтармен толық жарақтандыруға, төсек қорын 50% — ға жаңартуға, ескірген инфрақұрылымды жаңартуға, күтілетін өмір сүру ұзақтығын 75 жасқа дейін жеткізуге мүмкіндік береді.
Осы орайда, медицина қызметкерлері «Жаңа жағдайдағы Қазақстан: іс- қимыл кезеңі» атты жылдың бас құжатына қолдау білдіріп, денсаулық сақтау саласын ілгерілетуге аянбай тер төгуге дайын. Халықтың бірлігі болса ғана, ел мықты болатынын ұмытпағанымыз абзал.
