Жамбыл облысында балалар қауіпсіздігі мен жасөспірімдер арасындағы құқық бұзушылықтардың алдын алу мәселесі бойынша арнайы штаб отырысы өтті. Жиында соңғы бір айда Байзақ және Жамбыл аудандарында болған екі қайғылы оқиға талқыланды: бір бала көз жұмып, екіншісі жансақтау бөлімінде жатыр.
Өңір басшылығы бұған дейін өткізілген рейдтер, сауалнамалар, ашық сабақтар мен тренингтердің нақты нәтиже бермегенін атап өтті. Қағаз жүзіндегі профилактика баланың өмірін сақтап қала алмайтыны айтылды.
Осыған байланысты мектептердегі жасырын сауалнамалар мен психологтардың жұмысы қайта тексеріледі. Сауалнама қорытындысы бойынша әр балаға қатысты нақты шаралар қабылдануы тиіс. Жасөспірімдер жиі жиналатын орындар тұрақты бақылауға алынып, полициямен бірлескен патрульдеу күшейтіледі.
Тәуекел тобындағы балалармен жеке жұмыс жүргізу және олардың бос уақытын тиімді ұйымдастыру да басты талап ретінде белгіленді.
Байзақ, Жамбыл, Қордай және Талас аудандары басшыларының жұмысы сынға алынды. Бірқатар лауазымды тұлғаларға қатысты қызметтік тексеріс жүргізіліп, тәртіптік жауапкершілік мәселесі қаралады. Аталған аудандардың полиция бөлімдері бастықтарының жұмысына да тексеріс жүргізу тапсырылды.
Серік Сәлемовке сөгіс түріндегі тәртіптік жаза қолданылмақ. Жамбыл, Талас, Байзақ және Қордай аудандарының әкімдеріне қатаң сөгіс беру, олардың идеология саласына жауапты орынбасарларына да қатаң тәртіптік шара қолдану жоспарланып отыр. Облыстық білім басқармасының басшысы Нұрбек Оршубековке және аталған аудандардың білім бөлімдері басшыларына қатаң тәртіптік жаза қолдану мәселесі қаралады.
«Заң мен тәртіп» қағидаты әр отбасынан, әр мектептен басталуы керек. Баланың қауіпсіздігі — мұғалім мен полицияның ғана емес, ата-ананың да ортақ жауапкершілігі. Негізгі мақсат — қайғылы жағдайдан кейін кінәліні іздеу емес, оның алдын алу.
