Бүгін Жамбыл политехникалық жоғары колледждің мәжіліс залында Жамбыл облыстық Қоғамдық кеңестің ұйымдастыруымен «Қазақстан Республикасының нәтижелі жұмыспен қамту және жаппай кәсіпкерлікті дамыту бағдарламасы аясында тегін кәсіптік-техникалық білім беру жобасының Жамбыл облысындағы орындалу барысы туралы» атты Қоғамдық тыңдау өтті. Тыңдаудың модераторы облыстық Қоғамдық кеңестің төрағасы Жандар Кәрібайұлы, төралқада Жамбыл облыстық мәслихат хатшысы Бағлан Қарашолақов, облыстық Қоғамдық кеңестің хатшысы — «100 жаңа есім» жобасының жеңімпазы Сембек Сейдазімов, облыстық Қоғамдық кеңестің әлеуметтік-мәдени салалар және үкіметтік емесұйымдармен байланыс жөніндегі комиссия төрайымы Гүлсін Орынбаева отырды. Ал, тыңдауға облыстық Қоғамдық кеңестің мүшелері, қалалық, аудандық Қоғамдық кеңестердің төрағалары, аудан, қала әкімдерінің орынбасарлары, облыс әкімдігінің басқарма басшылары мен олардың жергілікті жерлердегі бөлімдерінің, Облыстық Кәсіпкерлер Палатасының, білім сапасын бақылау департаментінің басшылары, колледждердің директорлары, БАҚ -ның өкілдері қатысты.
— Ендеше, бұл бағытта облыста қандай іс-шаралар қолға алынып жатыр? Жетістігіміз қайсы, осал тұстарымыз неде?
Бүгінгі қоғамдық тыңдауда осы сұрақтарға мақсаткерлікпен жабыла жауап іздеп алдағы атқарылар міндеттерді анықтап, оларды рет-ретімен шешудің жолдарын белгілеп Қоғамдық кеңестер туралы заңның 3 бабының 8 және 21 бабының 9 тармақтарының талаптарына сәйкес атқарушы биліктің осы мәселені қарап, шешім қабылдауына міндетті ұсынымдар қабылдауымыз қажет. Өйткені Қазақстанның Үшінші жаңғыруы және әлемдік төртінші өнеркәсіптік революция кезеңінде іс тағдырын заманауи техника мен технологияны жан-жақты жетік меңгерген білекке емес, білімге сенетін білікті ұрпақ ғана шеше алады — деп мәлімдеді Жандар Кәрібайұлы.
Қоғамдық тыңдауда облыс әкімдігі білім басқармасы басшысының орынбасары Талғат Жамалов, облыс әкімдігі жұмыспен қамтуды үйлестіру және әлеуметтік бағдарламалар басқармасы басшысының орынбасары Сейдахмет Сейтбеков, Жамбыл жоғарғы политехникалық колледжінің директоры Жанар Орынбаева, облыстық кәсіпкерлер палатасының директоры Мәріпбек Шәкербек, қазіргі заманғы гуманитарлық-техникалық колледждің директоры Фарида Нақыш, ішкі аудит қызметінің бас маманы – мемлекеттік аудиторы Медет Дәрібаев баяндама жасады.
Жиынның соңынан облыстық Қоғамдық кеңестің ұсынымы қабылданды.
TURANINFO.KZ
