Жаңа орталықтың жұмысымен облыс әкімі Ербол Қарашөкеев пен «Азаматтарға арналған үкімет» мемлекеттік корпорациясы» КЕАҚ басқарма төрағасы Арман Кенжеғалиев танысты.
Кеңседе тұрғындарға қызмет көрсетудің бірнеше аймағы қарастырылған. Атап айтқанда, экспресс-қызмет алу, цифрлық сервистерді пайдалану, мамандардан кеңес алу және оқыту аймақтары жұмыс істейді. Сондай-ақ келушілерге арналған демалыс орны жабдықталған. Орталық заманауи моноблоктармен, жоғары жылдамдықтағы сканерлермен және eGov GPT жүйесіне қол жеткізуге мүмкіндік беретін ақпараттық панельдермен қамтамасыз етілген.
Кеңседегі басты жаңашылдықтардың бірі – құжаттандыру терминалы. Оның көмегімен азаматтар жеке куәлік пен паспорт алуға немесе оларды ауыстыруға өтінімді өз бетінше бере алады.
Сонымен қатар мұнда eGov GPT жасанды интеллект жүйесі іске қосылған. Цифрлық құрал мемлекеттік қызметтер туралы қажетті ақпаратты жедел табуға, оларды алу тәртібін түсінуге және электрондық үкімет порталында бағдар алуға көмектеседі. Пайдаланушылар жүйеге сұрақтарын мәтінмен де, дыбыстық хабарлама арқылы да жолдай алады. Қазіргі уақытта сервис қазақ және орыс тілдерінде қолжетімді.
Тұрғындардың цифрлық сауаттылығын арттыру мақсатында орталықта тегін оқыту сабақтары да өткізіледі. Қатысушылар электрондық мемлекеттік қызметтерді пайдалану жолдарын меңгеріп, қажетті практикалық дағдыларды үйрене алады. Сабақтар аптасына екі рет – бейсенбі және жұма күндері сағат 10:00-де және 12:00-де ұйымдастырылады.
Айта кетейік, Тараз қаласындағы AI-кеңсе – осындай форматтағы алғашқы орталық. Ал республика бойынша бұл – тоғызыншы AI-кеңсе.
