Шаһардың коммуналдық қызмет мамандары күн сайын таңсәріден іске кірісіп, көшелер мен жаяу жүргіншілер жолдарын, саябақтар мен гүлзарларды тазалап, қаланың көркеюіне үлес қосып келеді, деп хабарлайды Тараз қаласы әкімдігінің баспасөз қызметі.
Қала тазалығы мен тұрғындарға қолайлы орта қалыптастыру абаттандыру жұмыстарының негізгі бағыттарының бірі. Осы мақсатта коммуналдық сала қызметкерлері арнайы техникалардың көмегімен көшелерді қоқыстан тазартып, жол жиектері мен тротуарларды ретке келтіруде. Жұмысшылар қоғамдық орындардың санитарлық жағдайына да ерекше назар аударып, күнделікті тазалық жұмыстарын үздіксіз атқаруда.
Атап айтқанда, аялдамалар, скверлер, саябақтар мен тұрғындардың тынығуына арналған демалыс аймақтары тазартылып, ретке келтірілуде. Сонымен қатар қала аумағындағы қоқыс жәшіктері уақытылы тазартылып, тұрмыстық қалдықтарды жинау және шығару жұмыстары тұрақты бақылауда.
Бұл жұмыстардың артында таңмен таласа тұрып, шаһар тазалығы үшін еңбек ететін коммуналдық қызмет мамандарының маңдай тері жатыр. Олар ауа райының қолайсыздығына қарамастан, өздеріне жүктелген міндеттерді жауапкершілікпен орындап келеді. Күнделікті көзге көріне бермейтін осы еңбектің нәтижесінде қала көшелері мен қоғамдық орындар таза әрі жинақы қалпын сақтауда.
Дегенмен қаланың тазалығы тек коммуналдық қызмет өкілдерінің жұмысына ғана байланысты емес. Тазалық әрбір тұрғынның азаматтық жауапкершілігі мен ортақ мәдениетінің көрсеткіші. Қоғамдық орындарда тазалық сақтау, тұрмыстық қалдықтарды белгіленбеген жерлерге тастамау, айналаға ұқыптылықпен қарау – қала тұрғындарының күнделікті дағдысына айналуы тиіс.
Әсіресе өскелең ұрпаққа қоршаған ортаны қорғаудың маңызын түсіндіріп, тазалық мәдениетін қалыптастырудың мәні зор. Өйткені туған қаласына жанашырлықпен қарау оның көшесін, ауласын, қоғамдық кеңістіктерін таза ұстаудан басталады.
Тараздың ажары мен тазалығын сақтау бағытындағы жұмыстар алдағы уақытта да жалғасын табады. Ал шаһардың шырайын арттыру – коммуналдық қызмет мамандары мен қала тұрғындарының бірлескен еңбегінің нәтижесі. Себебі таза қала – жайлы өмірдің, жоғары мәдениет пен ортақ жауапкершіліктің айқын көрінісі.
Мақала Жамбыл облысы әкімдігі ақпарат және қоғамдық даму басқармасы мемлекеттік ақпараттық саясат тапсырысы негізінде жарияланды
