Есепті кезеңде кеңес мүшелері екі кеңейтілген отырыс пен төралқа және комиссиялардың 11 отырысын өткізді. Қаралған мәселелердің басым бөлігі жергілікті тұрғындарға көрсетілетін мемлекеттік қызметтердің сапасын арттыруға, тетіктерін жетілдіруге және ашықтықты қамтамасыз етуге бағытталды. Осы мақсатта тоқсан сайын қала әкімі аппаратының ақпараттандыру және мемлекеттік қызмет көрсету мониторингі бөлімшесі басшысының ішкі бақылау нәтижелері бойынша есебі тыңдалып, сараланып отырды.
Кеңес жұмысында жергілікті атқарушы органдар басшыларының тікелей есеп беруіне ерекше маңыз берілді. Осы уақыт ішінде 4 бірдей дербес бөлім басшысы өз салалары бойынша қоғамдық кеңес алдында жауап берді. Бұдан бөлек, қала тұрғындарының тыныс-тіршілігіне тікелей әсер ететін нормативтік-құқықтық актілердің жобаларына құқықтық сараптамалар жүргізіліп, қоғам мүддесіне қайшы келетін тұстары бойынша түзетулер ұсынылды. Кеңестің бастамасымен көтерілген өткір мәселелер мен қабылданған шешімдер бұқаралық ақпарат құралдарында, атап айтқанда, «Жамбыл-Тараз», «Ақ жол», «Знамя труда» газеттері мен жергілікті телеарналарда, сондай-ақ әлеуметтік желілерде кеңінен жарияланып, қоғамдық резонанс тудырды. Кеңес мүшелері алдағы уақытта да тұрғындардан түскен әрбір өтініш пен ұсынысты назардан тыс қалдырмай, заң аясында бақылауда ұстайтындарын жеткізді.
Ақпарат Жамбыл облысы әкімдігі ақпарат және қоғамдық даму басқармасы мемлекеттік ақпараттық саясат тапсырысы негізінде жарияланды
