Байзақ ауданында тұрғын үй кезегінде тұрған 140 отбасыға жаңа пәтердің кілттері табысталды. Аудан орталығы Сарыкемер ауылында бой көтерген 5-қабатты 60 пәтер, 1-қабатты 80 пәтер «Отбасы банк» АҚ-ы арқылы халық игілігіне берілді.
Салтанатты жиында сөз сөйлеген аудан әкімі Олжас Баққараев тұрғындарды қоныс тойымен құттықтап, халықты баспанамен қамту Қазақстан Республикасының Президенті жүктеген маңызды міндеттердің бірі екенін атап өтті.
Ауданда соңғы үш жылда үй құрылысы қарқынды жүргізіліп, нәтижесінде 618 отбасы жаңа баспанаға ие болды. Оның ішінде, 5-қабатты 7 тұрғын үйден, 420 пәтер, ал 99 бір қабатты, тұрғын үйден 198 пәтер дайындалған. Сонымен қатар, жыл соңына дейін тағы 1-қабатты 4 тұрғын үйдің құрылысы аяқталып,8 пәтерді сатып алу жоспарлануда.
Жаңадан пайдалануға берілген үйлер заманауи талаптарға сай салынып, қажетті инженерлік инфрақұрылыммен толық қамтамасыз етілген.
Өз кезегінде «Отбасы банк» АҚ-ның Жамбыл облыстық филиалы директорының орынбасары Талғат Жақсылықов, аудандық мәслихат төрағасы Бақтияр Ақбаев, ардагерлер кеңесінің төрағасы Бердібек Омаров және Қоғамдық кеңестің төрағасы Қыдырәлі Оралов тұрғындарды қуаныштарымен құттықтап, жаңа қоныстарында береке мен бақ тіледі.
Жаңа баспанаға қол жеткізген тұрғындар мемлекет тарапынан көрсетіліп жатқан қолдауға ризашылықтарын білдіріп, қоныс тойының қуанышымен бөлісті.
Пәтерлер тұрғын үй кезегінде тұрған әлеуметтік осал санаттағы азаматтарға, атап айтқанда толық емес, көпбалалы, ерекше баланы тәрбиелеп отырған отбасыларға, сондай-ақ І және ІІ топтағы мүгедектігі бар азаматтарға берілді.
Тұрғын үй кезегінде тұрған азаматтарды баспанамен қамту бағытындағы жұмыстар аудан көлемінде кезең-кезеңімен жалғасатын болады.
