Бұл ұйымның басты мақсаты — өңірдегі ҮЕҰ (үкіметтік емес ұйымдар) секторын нығайту, олардың қызметін сапалы әрі тиімді ету үшін барлық жағдай жасау. Сонымен қатар, ұйым қоғамдық бастамалардың жүзеге асуына қолдау көрсетіп, заңдық, әлеуметтік және экономикалық тұрғыдан қолайлы орта қалыптастыру арқылы азаматтық қоғамның дамуына жол ашуда.
Альянстың қызметі қоғам мен мемлекеттік құрылымдардың, халықаралық ұйымдар мен бизнес сектордың өзара серіктестігін нығайтуға бағытталған. Осындай көпжақты әріптестікті жолға қою арқылы өңірдегі азаматтық белсенділікті арттырып, жаңа жобалардың жүзеге асуына жағдай жасалып келеді.
Ұйым жүзеге асырған жарқын жобалардың бірі — «Әулиеата – Кітап оқитын өңір» бастамасы. Бұл жоба аясында ұйымдастырылған «Ой шебері» атты зияткерлік ойын жастардың кітап оқуға деген қызығушылығын оятып, әдебиетке жақын болуға үндеді. Жоба барысында 10 000-нан астам адам зияткерлік сайыстарға қатысып, 1 000-нан аса кітап балаларға сыйлыққа берілді. Сонымен қатар, 350-ден астам команда аталған ойынға атсалысты. Бұл бастама жастардың ойлау қабілетін дамытуға, бос уақытын тиімді өткізуге және мәдени өсуіне бағытталған сәтті үлгілердің бірі болды.
Альянс сонымен қатар «Jamby 1 civil hub» жобасын іске асырып, өңірдегі үкіметтік емес ұйымдар үшін тәжірибелік әрі құқықтық қолдауды жүйелі түрде жолға қойды. Жоба аясында 100-ден астам ҮЕҰ өкілдеріне тегін кәсіби және құқықтық кеңестер берілді. Сондай-ақ, ҮЕҰ жұмысына қатысты өзекті мәселелер бойынша онлайн сабақтар ұйымдастырылып, олар 51 ұйымды қамтыды.
Азаматтық Альянстың бастамасымен еліміздің білікті сарапшыларының қатысуымен ауқымды семинарлар өтіп, «Қазақстанның үздік әлеуметтік жобалары» байқауы ұйымдастырылды. Нәтижесінде бұл жобаларға 240-қа жуық үкіметтік емес ұйым тартылды.
Қоғамдық ұйымдар мен бастамаларға қолдау көрсетіп, оларды біріктіре отырып дамуға жетелейтін бұл құрылым — Жамбыл өңіріндегі азаматтық қоғамның қозғаушы күшіне айналып отыр. Бүгінгі таңда Альянс ҮЕҰ арасындағы ынтымақтастықты нығайтып, ел дамуына нақты үлес қосып келе жатқан сенімді серіктес екенін дәлелдеді.
Ақпарат Жамбыл облысы әкімдігі ақпарат және қоғамдық даму басқармасы мемлекеттік ақпараттық тапсырыс негізінде жарияланды.
