Оның айтуынша, 2021 жылдан бастап Қазақстан Ұлттық бірыңғай тестілеуді электронды форматта өткізетін посткеңестік кеңістіктегі алғашқы ел атанды. Бұл формат білім алушылар үшін де, бақылаушылар үшін де тиімділігін көрсетіп отыр. Бұрынғы қағаз форматында нәтижелер кешігіп шықса, апелляция процесі де уақыт алатын. Ал қазір цифрлы жүйе арқылы нәтижелер жылдам әрі ашық беріледі.
«Тестілеу кезінде екі түрлі бақылау камерасы жұмыс істейді: біріншісі – фронталды камера, ол тест тапсырушының жеке тұлғасын сәйкестендіреді. Екіншісі – жоғарыдан түсіретін бақылау камерасы. Бұл камера арқылы тестілеу барысы Ұлттық тестілеу орталығының ахуалдық орталығына тікелей трансляцияланады. ҰБТ аяқталған соң, осы жазбалар толықтай қаралады. Егер оқушы тарапынан ереже бұзушылық анықталса – мысалы, тыйым салынған заттарды пайдалану немесе бөгде әрекет – онда оның нәтижесі жойылады. Тіпті грант иегері болса да, бұл жеңілдіктен айырылады», – деді Наужан Дидарбекова.
ҰТО өкілі бұл қадамдар әділеттілік пен ашықтықты қамтамасыз ету үшін жасалып жатқанын атап өтті.
Айта кетейік, 2025 жылғы Ұлттық бірыңғай тестілеудің (ҰБТ) негізгі кезеңі 16 мамырда басталып, 7 шілдеге дейін жалғасады. Бұл кезеңде талапкерлер тестілеуді екі рет тапсырып, ең жоғары нәтижемен мемлекеттік білім беру грантына үміткер бола алады. Биыл 216 мыңға жуық талапкер 399 мыңнан астам өтініш тапсырған.
