Бас қала маңындағы тілсіз жауды сөндіруге аймақтардан өрт сөндірушілер мен техника тартылды, — деп хабарлайды turaninfo.kz ақпарат агенттігі Астана қалалық ТЖ департаментіне сілтеме жасап.
«Астана қаласы ТЖД Өрт сөндіру бөлімшелері алдын ала болжам бойынша 50 гектар аумақта құрғақ шөп өртін сөндіруді жалғастыруда. Қорғаныс министрлігінің тікұшақтары 18 рет – 63 тоннадан астам су шашты. ҚР Төтенше жағдайлар министрі Сырым Шәріпханов пен Астана қаласының әкімі Жеңіс Қасымбек өртті сөндіруді үйлестіру үшін сол жерде жүр», — деп жазылған ТЖД хабарламасында.
Сонымен бірге, елордалық өрт сөндірушілерге көмекке Ақмола облысының жеке құрамынан 18 адам, 5 техника және Қарағанды облысынан 5 техника мен 25 адам көмекке шықты.
Салдарынан Астана көшелерін түтін басып, дәрігерлер көшеге шықпауға шақырды.
Қазгидромет РМК Астанадағы ауа сапасына тексеру жүргізіп, азот оксиді мен азот диоксиді шамадан тыс артқанын хабарлады.
