1 шілдеде Қазақстан Қарулы Күштерінде Сержанттар күні аталып өтті. Осы кәсіби мерекеге орай Тараз қаласының Достық үйінде салтанатты жиын өтіп, оған «Оңтүстік» өңірлік қолбасшылығына қарасты әскери бөлімдердің үздік сержанттары қатысты.Бұл туралы Turaninfo. kz ақпараттық агенттігі хабарлайды.
Штаб сержанты Сәрсенғали Батрашев әріптестерін құттықтап, жақсы қызметі үшін марапаттар табыс етті.
– Қазақстан посткеңестік кеңістікте бірінші болып кәсіпқой сержанттар жүйесін әзірледі. 1996 жылы 1 шілдеде кәсіби сержанттардың ұстазы Шоқан Уәлиханов атындағы Кадет корпусы құрылды. Қазіргі уақытта Кадет корпусы Қазақстан Республикасы Қорғаныс министрлігінің Әскери колледжі болып қайта құрылды», — деді С.Батрашев
Кәсіби сержанттар институтын енгізу офицерлерге түсетін ауыртпалықты азайтуға, оларды әдеттен тыс қызметтік міндеттерін орындаудан босатуға, тактикалық тапсырмаларды жоспарлауға, басқаруға және әзірлеуге назар аударуға мүмкіндік бергенін түсіндірді. Күн тәртібіндегі негізгі элементтерді жүзеге асыруға байланысты барлық күнделікті іс-шаралар, сондай-ақ сарбаздардың жеке дайындығы, оларды оқыту және тәрбиелеу сержанттардың иығындағы негізгі жүк.
Сержанттар кіші командирлер деңгейіне жатады және ең көп командалық құрамды білдіреді. Олар қарамағындағыларға қару-жарақ пен әскери техниканы оқуға және басқаруға, олармен күнделікті кезекшілікте қызметті ұйымдастыруға және өткізуге, әскери тәртіпті нығайту бойынша күнделікті жұмыстарды жүргізуге көмектеседі. Бұл жерде сержанттардың жеке үлгісі, беделі мен жоғары адамгершілік қасиеттері, жұмысқа деген риясыз көзқарасы, тәртібі ерекше маңызды.
Бүгінде сержанттар құрамы Қазақстан армиясының құрамдас бөлігі болып табылады. Жауынгерлік даярлық, бөлімшелердегі әскери тәртіптің жағдайы, жеке құрамның моральдық және жауынгерлік рухы көп жағдайда сержанттардың кәсібилігіне байланысты.
30 жыл ішінде Қазақстан Республикасының Қарулы Күштері кәсіби сержанттар корпусының өзіндік, біртіндеп дамып келе жатқан үлгісін құра алды.
Мұнымен қоса осы күні «Қазфосфат» стадионында «Оңтүстік» өңірлік қолбасшылығы қолбасшысының жүлдесі үшін әскери бөлімдердің сержанттары арасында футболдан жолдастық кездесу өтті.
Арайлы Жақсылық
