Жақында Талас ауданы, Сейілбек ауылдық клубында «Өмірі – өнеге, өнері – үлгі» тақырыбында Шона Смаханұлы атындағы негізгі мектеп ұжымының ұйымдастыруымен белгілі жазушы, журналист, драматург, Қазақстан Жазушылар одағының мүшесі, ҚР мәдениет қайраткері Болат Бекжановты еске алуға арналған әдеби-сазды кеш өтті.
Еске алу кешіне Шерхан Мұртаза атындағы руханият және тарихтану орталығының аға ғылыми қызметкері Ерман Әбдиев, Б.Бекжановтың жұбайы Жалғат Айтуева, белгілі күміс көмей әнші, ақынның замандасы Жақсылық Тұрсынбайұлы, ауыл әкімі Нұржан Мүхтарұлы, ақсақалдар алқасының төрағасы Пана Рахманбердіұлы және ауыл қариялары қатысып, естеліктерімен бөлісті.
Кеш қойылымына ақынның өлең-жылары арқау болды. Болат Үмбетәліұлын еске алу барысында Ерман Әбдиев жазушы-драматург туралы жан тебірене сөйлеп, оған деген сағынышпен көзіне жас алды.
Өмірде серік, сыңарымсың,
Жыр әнімсің, дедім.
Серт-сөзге берік,
Шынарымсың, ұғарымсың, менің.
Айналып келіп,
Байланар ерік, қазығымсың темір.
Жайқалған желек.
Жаз гүлімсің, Нәзігімсің, керім, – деп ағамыз жыр жолдарын арнаған жан жары Жалғат Айтуева ақынның отбасындағы әкелік орны, қоғам алдында көтерген жүгі, отбасындағы тәлім-тәрбиелік рөлі, ақынның мәнді, мазмұнды ғұмыры туралы сырын көпшілікпен бөлісті. Жалғат Әбдірахманқызы Үмбетәлі атамыздың қара шаңырағына 18 жасынан ақ босағаны аттап, келін болып түскен күннен бастап ақынның өзіне деген, отбасына деген ерекше ықыласын, мейірімін, балаларына деген әкелік орнын биік қоя білген, аяулы жар, ардақты азамат болғанын сөз етті. Туған елін шын сүйетін ақынның шығармалары ертеңгі ұрпаққа сабақ боларына сенім білдірді. Болат ағаның еліне, халқына, туған жеріне, досқа, сондай-ақ махаббат тақырыбына арнаған әндерін тамылжыта орындаған Жақсылық Тұрсынбайұлы «Үштаған» әнінің шығу тарихын, ақынның ән тудырудағы жан толғанысын жеткізе отырып, көрермен көкейіне келелі ой салды.
Талас, Талас, жайлауым, бауырларым,
Бауырластың дертімен ауырғанмын.
Тамырын да тарихын сеніменен,
Толғап тартып отырар ауылданмын, – деп туып өскен Сейілбек ауылымен қоса Талас өңірін жырына арқау еткен, ел тарихының төрінен, елінің жүрегінен өшпестей орын алған ақиық ақынның жырлары әлі де өз заманының, ізбасар ұрпақтарының аңызына айналары даусыз.
Талас, Талас, Тағдырым – өмір-өзен,
Кейде өзіңдей, толқиды, көңіл көзем,
Әр толқыннан Сен де, Мен де,
Тылысым-ғайып тербеген егіз-өлең, – деп ақын туындысына арқау болған Сейілбек ауылының төрінде өткен еске алу кешінде Шона Смаханұлы атындағы негізгі мектептің және Дінмұхаммед Қонаев атындағы орта мектептің оқушылары ақын өлеңін мәнерлеп оқып, арнайы дипломдармен марапатталды. Жеткіншектер келген қонақтардың, ауыл қарияларының ақ батасын алды.
Алмастай жанып өткен, туып өскен елінің байрағы болған жазушы Болат Үмбетәліұлының өмірі кейінгі ұрпаққа өнеге, өнері үлгі ретінде мәңгі жасап, аласармай биіктей беретіні хақ!
