Атап айтқанда, №127-ж/қ өкімімен Асқар Маратұлы Байдалиев Жамбыл ауданы әкімдігінің мәдениет және тілдерді дамыту бөлімінің басшысы лауазымына тағайындалды. 1982 жылы Жамбыл ауданы Аса ауылында дүниеге келген ол М.Х.Дулати атындағы Тараз мемлекеттік университетін «Музыка және ән айту пәнінің мұғалімі» мамандығы бойынша бітірген. Асқар Маратұлы еңбек жолын мәдениет үйінің үйірме жетекшісі ретінде бастап, кейін аталған бөлімнің бас маманы, сегіз жыл бойы басшысы, сондай-ақ ішкі саясат бөлімінің және аудан әкімі аппаратының ұйымдастыру инспекторлық бөлімшесінің жетекшісі қызметтерін атқарған. Осы тағайындауға дейін Аса ауылдық округі әкімінің орынбасары болып еңбек еткен, бүгінде отбасылы, 5 бала өсіріп тәрбиелеуде.
Ал №126-ж/қ өкімімен Ошақбай Қуат Қанатұлы Жамбыл ауданы әкімдігінің ішкі саясат бөлімінің басшысы лауазымына бекітілді. 1994 жылы Қаратау қаласында туған ол «Дене шынықтыру және спорт» және «Құқықтану» мамандықтары бойынша қос жоғары білім алған. Еңбек жолында «Лашын» футбол клубының футболшы-нұсқаушысы, Қаратау қалалық және Талас, Жамбыл аудандары әкімдері аппараттарында жетекші әрі бас инспектор болып қызмет атқарған. Сонымен қатар, кәсіпкерлік және өнеркәсіп бөлімін басқарып, соңғы уақытта дене шынықтыру және спорт бөлімінің басшысы лауазымында еңбек еткен, отбасында 2 бала тәрбиелеп отыр.
Сонымен қатар, №128-ж/қ өкімімен Сағынбек Қыдыралыұлы Бестереков Жамбыл ауданы әкімдігінің дене шынықтыру және спорт бөлімінің басшысы лауазымына ауысу тәртібімен тағайындалды. 1985 жылы Жамбыл ауданы Ерназар ауылында туған Сағынбек Қыдыралыұлы «Экология» және «Құқықтану» мамандықтары бойынша білім алған. Ол өз еңбек жолында Сарысу аудандық Халыққа қызмет көрсету орталығында кеңесші, Ерназар ауылдық округі әкімі аппаратының бас маманы болып жұмыс істеген және осы уақытқа дейін Жамбыл ауданы әкімдігінің дене шынықтыру және спорт бөлімінің бас маманы болып қызмет атқарып келген, бүгінде 6 баланың әкесі.
