Сарыбұлақ ауылдық округінде орналасқан «Надежда-1» шаруа қожалығы құлпынай алқабынан 13 тонна өнім жинап, облыс нарығына өткеруде. Биыл қожалық 11 гектар алқаптан 60 тонна өнім жинауды жоспарлауда…
Былтыр қожалық 5 гектар құлпынай алқабынан 50 тонна өнім жинаған. Тәжірибелі агроном, агроқұрылым басшысы Константин Эмнің айтуынша, бүгінгі таңда қожалық барлық күшті құлпынай жинау жұмысына жұмылдырған. Терімге 65 жұмысшы тартылған. Қазірдің өзінде шаруашылық құлпынай алқабынан 13 тонна өнім жинап, облыс нарығына өткерген.
Жиналған өнім еліміздің барлық облыс орталықтарына алқаптан арнайы көліктермен тікелей жөнелтілуде. Адам ағзасына зиянды химиялық қоспасы жоқ құлпынай табиғи жағдайда өсірілген таза өнім болып табылады. Мұнымен қоса, агроқұрылым ауыл шаруашылығы өнімінің көлемін ұлғайту және егіс алқаптарын әртараптандыру ісіне айтарлықтай үлесін қосып келеді. Шаруашылық әрі қарай құлпынай өндірісін одан әрі ұлғайтып, өнімді экспортқа шығаруды жоспарлап отыр.
Сонымен қатар, алдағы уақытта алқапқа тамшылатып суару технологиясын енгізуді мақсат етіп отырған қожалық жеміс-жидек пен көкөніс өсіруді қолға алмақ ниетте.
Қожалық жетекшісі алдағы уақытта құлпынайдан бөлек, басқа да жеміс-жидек пен көкөністі өсіріп, экспорттау арқылы аудан және облыс экономикасының дамуына үлес қоспақ. Себебі мұнда таңқурай, пияз,
сарымсақ, алма өсіруге де қолайлы жағдай бар.
Дереккөз Жамбыл облысының өңірлік коммуникациялар қызметі
