Қазақстанда кітап оқу мәдениетін дамытуға бағытталған жаңа кезең басталмақ. Мемлекет басшысы Қасым-Жомарт Тоқаев адам капиталын дамыту, қоғамның зияткерлік және мәдени әлеуетін күшейту мақсатында арнайы Жарлыққа қол қойды. Құжатта білім беру, оқу-ағарту және кітап оқу мәдениетін дамыту мемлекеттік саясаттың негізгі басымдықтарының бірі ретінде айқындалған, — деп хабарлайды Тuraninfo.kz сайты Ақордаға сілтеме жасап.
Президент Жарлығында қазіргі қоғам үшін кітаптың маңызы ерекше екені атап өтілген. Мемлекет енді тек білім берумен шектелмей, оқитын, ойлайтын әрі талдай алатын ұлт қалыптастыруға басымдық береді. Бұл бастама әсіресе жас ұрпақтың рухани және интеллектуалдық дамуына жаңа мүмкіндік ашпақ.
Жарлыққа сәйкес, елде кітап оқу мәдениетін дамытуға арналған кешенді жұмыстар қолға алынады. Оның ішінде жаңа форматтағы кітапханалар ашу, қоғамдық интеллектуалдық кеңістіктер қалыптастыру, цифрлық технологияларды кеңінен енгізу қарастырылған. Яғни кітапхана енді тек кітап сақтайтын орын емес, жастар бас қосатын, білім алатын және шығармашылықпен айналысатын заманауи ортаға айналмақ.
Сонымен қатар, мемлекет жас ұрпақты тәрбиелеуге үлес қосып жүрген отандық жазушылар мен ақындарды қолдауды күшейтеді. Ұлттық әдеби мұраны насихаттау, шығармаларды шетел тілдеріне сапалы аудару және халықаралық деңгейде тарату мәселесіне де ерекше назар аударылған.
Жарлық аясында бірқатар маңызды жобалар жүзеге асырылады. Атап айтқанда, 2026 жылдың 1 қыркүйегіне дейін республика көлемінде «Жылдың 10 оқырманы» жобасы басталады. Ал 2027 жылға дейін кітап оқу мәдениетін дамытудағы жетістіктер үшін арнайы Ұлттық сыйлық тағайындалмақ.
Сондай-ақ елде бірыңғай Ұлттық цифрлық кітапхана платформасы құрылып, «Кітапхана және кітап шығару ісі туралы» жаңа заң әзірленеді. Бұдан бөлек, жасанды интеллект дәуіріндегі оқу мәдениетін қалыптастыру мақсатында 2027–2031 жылдарға арналған «Зерделі ұлт» тұжырымдамасы қабылданады.
Бұл бастама — жай ғана мәдени жоба емес. Бұл — ұлттың сапасын арттыруға бағытталған стратегиялық қадам. Себебі кітап оқитын қоғам — ойлайтын қоғам. Ал ойлайтын ұлт қашанда бәсекеге қабілетті болады.
Жарлықтың толық мәтінін мына жерден оқи аласыздар.
