Кітап – уақыт пен ұрпақ арасын жалғайтын рухани көпір, ұлттың жадын жаңғыртып, қоғамның таным көкжиегін кеңейтетін құндылық. Қаламгердің жүрек түкпірінен шыққан ойы мен өмірден түйген тағылымы кітап арқылы оқырманға жетіп, кейінгі буынға аманат болып қалады. Сондықтан әдеби мұраны насихаттау, жергілікті авторлардың шығармашылығын қолдау және тұрғындардың кітап оқуға деген қызығушылығын арттыру – кітапхана жұмысының маңызды бағыттарының бірі.
Жамбыл облысында осы бағыттағы жұмыстар жүйелі түрде жүзеге асырылып келеді. 2026 жылдың алғашқы тоғыз айында өңір бойынша 27 кітаптың тұсаукесері ұйымдастырылды. Оның 15-і Ш.Уәлиханов атындағы Жамбыл облыстық әмбебап-ғылыми кітапханасында өтті. Мұнда жергілікті ақын-жазушылар мен қаламгерлердің жаңа туындылары оқырман назарына ұсынылып, әдеби орта мен кітапсүйер қауымның басын қосқан тағылымды кездесулер ұйымдастырылды. Мұндай басқосулар автор мен оқырман арасындағы байланысты нығайтып, шығармалардың мазмұнын тереңірек тануға мүмкіндік береді. Сонымен қатар қаламгерлердің шығармашылық ізденісіне серпін беріп, өңірдің әдеби өмірін жандандыруға ықпал етеді.
Кітап таныстыру ісі облыс орталығымен ғана шектелмей, аудандарда да жалғасын тапты. Аудандық орталықтандырылған кітапханалар жүйесінде жергілікті авторлардың еңбектерін көпшілікке таныстыруға, олардың шығармашылық жолын дәріптеуге арналған бірқатар мәдени-әдеби іс-шара өткізілді.
Жамбыл ауданында «Жамбыл – қаламгерлер мекені» тақырыбы аясында әдеби мұраны насихаттауға басымдық берілді. Қаламгер, ардагер журналист Тұрсынкүл Ентаеваның «Іңкәр сезім» және «Жапырақтар оқитындай бізге өлең» атты жаңа кітаптарының тұсаукесері ұйымдастырылды. Ал Қордай ауданында ардагерлер алқасының мүшесі, Әкелер кеңесінің төрағасы Бақыт Оразайұлының «Ұстаз ұлағаты – өмір тағылымы» атты кітабы оқырманға таныстырылды. Сондай-ақ Қазақстан Журналистер одағының мүшесі Құрманбек Әлімжанның «Сұрмерген Әбіл» атты кітабы мен жазушы, аутогендік жаттығулар және психотерапия саласының маманы, нарколог Есімқұл Халықбаевтың «Алғыс» атты еңбегінің тұсаукесері өтті. Бұл басылымдар ауданның әдеби-мәдени өмірін толықтырып, жергілікті авторлардың шығармашылығын кеңінен танытуға мүмкіндік берді.
Т.Рысқұлов ауданында журналист, филология ғылымдарының кандидаты Қанат Әуесбайдың «Бақ берген әулет» атты кітабы оқырманға жол тартты. Талас ауданында ақын, Қазақстан Жазушылар одағының мүшесі, Қазақстан Республикасының Мәдениет қайраткері, Талас ауданының Құрметті азаматы Нарша Қашағанұлының 75 жылдық мерейтойына орай «Еркесі едім, мен де елдің» атты кітабының тұсаукесері ұйымдастырылды. Тағылымды басқосу ақынның шығармашылық мұрасын дәріптеп, оқырманның қаламгер өмірі мен өлеңдеріне деген қызығушылығын арттыруға бағытталды.
Жуалы ауданында Көкбастау ауылдық округі Ардагерлер кеңесінің төрағасы Аташбек Әмірқұлұлының «Туған жер тұғырың» атты кітабы көпшілікке таныстырылды. Туған өлкені арқау еткен мұндай еңбектер елге қызмет ету, атамекенге құрмет көрсету және кейінгі ұрпаққа өнеге қалдыру секілді құндылықтарды дәріптеуге жол ашады. Сарысу ауданында жазушы-журналист, Қазақстанның Құрметті журналисі Жеңіс Шыныбекұлының «Ажалсыз Аждаһа» атты кітабының тұсаукесері өтті.
Меркі ауданында өңірден түлеп ұшқан ақындардың шығармашылығын тоғыстырған «Меркілік ақындар әлемі» атты кітаптың таныстырылымы ұйымдастырылды. Бір жинаққа бірнеше ақынның шығармаларын топтастыру жергілікті әдеби ортаның тынысын танытып, сөз өнеріндегі сабақтастықты көрсетудің тиімді жолы саналады. Мұндай басылымдар арқылы оқырман бір өңірден шыққан қаламгерлердің шығармашылық ерекшелігімен танысып, олардың әдебиетке қосқан үлесін бағамдай алады.
Мойынқұм аудандық орталық кітапханасында Жетібай Құлтаевтың «Абырой аманаты» топтамасына қатысты кітаптардың тұсаукесері өтті. «Абырой аманаты – ұрпаққа өнеге!» атауымен ұсынылған еңбектердің жалпы саны 12 кітапты құрады. Кітаптар топтамасының таныстырылуы ауданның рухани-мәдени өміріндегі маңызды оқиғалардың біріне айналды.
Жалпы, облыс көлемінде ұйымдастырылған кітап тұсаукесерлері жергілікті қаламгерлердің шығармашылығын насихаттауға, әдеби мұраны сақтауға және оқырман қауымның жаңа туындыларға деген қызығушылығын арттыруға бағытталған. Әсіресе аудандық кітапханаларда өтетін әдеби кездесулер тұрғындардың мәдени өмірге араласуына, жас буынның әдебиетке жақындауына мүмкіндік береді.
Бүгінде ақпарат ағыны күшейіп, цифрлық технологиялар күнделікті өмірдің ажырамас бөлігіне айналған кезеңде кітаптың қоғамдық маңызы арта түсуде. Кітап оқу адамның ойлау қабілетін дамытып, сөздік қорын байытады, дүниетанымын кеңейтеді. Ал туған жердің тарихын, елдің тынысын, адам тағдырын арқау еткен жергілікті қаламгерлердің шығармалары оқырманға өз ортасын тереңірек тануға көмектеседі.
Тоғыз айда 27 кітаптың тұсаукесерінің ұйымдастырылуы – өңірдегі әдеби-мәдени жұмыстың нәтижесін көрсететін маңызды көрсеткіш. Әр кітаптың артында автордың ізденісі, өмірлік тәжірибесі мен оқырманға жеткізер ойы бар. Сол рухани аманаттың көпшілікке жетуіне жол ашатын кітапханалардың еңбегі де айрықша. Өйткені кітаптың ғұмыры оны басып шығарумен аяқталмайды. Оның шынайы өмірі оқырман қолына тигенде, ойға қозғау салып, жүрекке әсер еткенде басталады. Сондықтан өңірде жаңа кітаптарды таныстыру, қаламгерлерге қолдау көрсету және оқу мәдениетін қалыптастыру бағытындағы жұмыстардың жалғасын табуы рухани дамудың маңызды шарты болып қала береді.
Мақала Жамбыл облысы әкімдігі ақпарат және қоғамдық даму басқармасы мемлекеттік ақпараттық саясат тапсырысы негізінде жарияланды
