Талап қоюшы Б. Қордай ауданының әкіміне, мүдделі тұлға К.-ға аудан әкімінің қаулысын заңсыз деп тану және оның күшін жою туралы талап арызымен сотқа жүгінді.
2014 жылы Қордай ауданы әкімінің қаулысымен азамат К.-ға жеке меншікке шаруа қожалығын жүргізу үшін жер учаскесі берілген. Ал талап қоюшы және «Р.» ШҚ-дан шыққан басқа да мүшелері қарапайым серіктестік нысанында құрылған «К.» ШҚ-ның мүшесі болып табылады және оның істерін жүргізу мүдделі түлға К.-ға тапсырылған.
Алайда жалпы жиналыстың хаттамалық шешімі негізінде ШҚ мүшелерінің үлестері К.-ның жеке меншігіне беріліп, кейін үшінші тұлғаларға сатылғаны анықталған. Бітімгершілік рәсімі барысында судья дауды медиация тәртібімен реттеу мүмкіндігін түсіндірген, нәтижесінде тараптар өзара тиімді келісімге келген.
Аталған келісімнің шарттары бойынша талап қоюшы талабынан бас тартады, ал мүдделі тұлға К. 01.06.2023 ж. дейінгі мерзімде Б.-ға 49 жыл мерзімге жалпы алаңы 5,57 га жер учаскесін уақытша өтеулі жер пайдалану құқығымен өтеусіз беруге міндеттенеді.
Сот ұйғарымымен медиативтік келісім бекітіліп, іс өндірісімен тоқтатылды, төленген мемлекеттік баж талап қоюшыға қайтарылды.
Сот ұйғарымы заңды күшіне енген жоқ.
Дереккөз: Жамбыл облыстық соты
