Сыбайлас жемқорлықпен ұсталған жемқор шенеуніктерден алынған қаражат есебінен 62 мектептің құрылысы қаржыландырылды, деп хабарлады Үкіметтің баспасөз қызметі.
«Бүгінгі таңда жемқорлардан алынған қаражатпен толықтырылатын қордың арқасында ҚР бірқатар өңірлерінде, әсіресе Астана, Алматы және Шымкент қалаларында 76 мың оқушы орнына (екі ауысымға) 62 мектеп салу қаржыландырылды», — делінген хабарламада.
Жалпы, қор құрылған сәттен бастап өткен жылдың желтоқсанында 151,6 млрд теңге түсті. Осы қаражат есебінен үш ауысымды оқыту, апатты білім беру мекемелері және қосымша ғимараттар мен интернаттар салу, реконструкциялау, жалпы оқушы орындарының жетіспеушілігі проблемалары шешілетін болады.
