Жамбыл облысында жастар саясатын дамыту, азаматтық белсенділікті қолдау және құқықтық мәдениетті қалыптастыру бағытында табысты жұмыс жүргізіп келе жатқан ұйымдардың бірі — «Жамбыл облысы Жастар мәслихаты» жастар қоғамдық бірлестігі. Аталмыш ұйымға өңірдегі белсенді жастардың бірі Азамат Намелбек жетекшілік етеді.
Бірлестік қызметінің негізгі мақсаты — мемлекеттік жастар саясатын ілгерілету, жастардың құқықтық және саяси сауаттылығын арттыру, азаматтық жауапкершілікті күшейту. Сонымен қатар, көшбасшылық пен басқарушылық қабілетті дамытуға, мәдени, әлеуметтік және білім беру салаларындағы жобаларды іске асыру арқылы қоғам игілігіне қызмет етуге баса назар аударылуда.
Ұйым жастардың шынайы үніне айналып, құқықтық мәдениетті қалыптастыру мен азаматтардың заңды мүдделерін қорғауға үлес қосып келеді. Осы мақсатта бірлестік Қазақстан Республикасының аумағында жүйелі түрде әлеуметтік маңызды бастамаларды қолға алып, азаматтық қоғамның дамуына серпін беріп отыр.
«Жамбыл облысы Жастар мәслихаты» бүгінгі күнге дейін бірқатар ауқымды жобаларды іске асырды. Соның ішінде ерекше атап өтерлігі — «BIRGEMIZ» жалпыұлттық жобасы аясында 12 шағын гранттың сәтті жүзеге асуы. Бұл жобалар өңірдегі нақты әлеуметтік мәселелерді шешуге бағытталып, жастардың жергілікті деңгейдегі белсенділігін арттыруға мүмкіндік берді.
Бұған қоса, бірлестік Нұрсұлтан Назарбаев Қоры ұйымдастырған «Әлеуметтік жобалар жәрмеңкесі» республикалық байқауында жеңімпаз атанып, өзінің тиімді жұмыс тәсілін және қоғаммен тығыз байланыстағы ұстанымын дәлелдеді.
Ұйымның тағы бір айрықша ерекшелігі — жастар ұйымдары, волонтерлік құрылымдар және мемлекеттік емес секторлармен орнатқан серіктестік байланыстары. Бұл серіктестіктер жас буынның әлеуетін арттыруға, идеяларын жүзеге асыруға және қоғамдық пайдалы істерге қатысуына жол ашады. Бірлестік жастардың шынайы көшбасшыға айналуына жол ашатын алаң ретінде өзін толықтай дәлелдеп үлгерді.
«Жамбыл облысы Жастар мәслихаты» — тек ұйым ғана емес, ол — жастардың ертеңге деген сенімін арттыратын, ел болашағына белсенді араласуына мүмкіндік беретін қозғалыс. Алдағы уақытта да бірлестік қоғам игілігіне бағытталған жобаларын жалғастырып, Жамбыл жастарының жарқын келешегі үшін еңбек ете бермек.
