Жамбыл облысы Байзақ ауданында аумақты оқ-дәрі сынықтарынан тазарту жұмыстары жүргізіліп жатыр. Былтырғы оқиғалардың салдарын жоюға арнайы біріккен топ жұмылдырылған. Оның құрамында инженерлік-саперлік бөлімшелерден 120-дан астам әскери қызметкер бар. Бөлімше аумағын сыртқы периметр бойынша күзету және тәртіпті бақылауды әскери полиция қызметкерлері жүзеге асырады.
— Оқ-дәрілерді жою бойынша жұмылдырылған отрядтың басты міндеті – аумақты жарылғыш заттардан толықтай тазарту. Қазіргі уақытта жарылыс зардаптарын жоюдың біріктірілген тобының жеке құрамы секторларды жарылыс қаупі бар объектілерден, жер үсті қабатын тазалау, сондай-ақ негізгі және қосалқы жолдарды қайта тазалау жұмыстарын жүргізуде. Жарылғыш заттардың сынықтарын жою арнайы брондалған пештерде жағу арқылы жүзеге асырылады. Бұл процесс жергілікті тұрғындар мен әскери қызметкерлерге қауіп төндірмейтін жағдайда жасалады, – дейді ҚР ҚК Құрлық әскерлері бас қолбасшысы басқармасы инженерлік әскерлер бас басқармасының бастығы, полковник Мадияр Увалиев.
Оқ-дәрілердің сынықтарын кәдеге жарату бойынша жою жұмыстары жақын арада әзірше жүргізілмейді.Зардаптарды жою жасағының әскери қызметшілеріне қойылатын ең басты талаптардың бірі – бұл жұмыс кезінде қауіпсіздік шараларын мүлтіксіз сақтау. Сондықтан әр жұмыс күні нұсқаулықпен таныстыру және қауіпсіздік шаралары туралы ескертуден басталады.
— Зардаптарды жою жиынтық жасағының құрамына бұрын жарылыс қаупі бар заттармен жұмыс істеген, жарылыс қаупі бар заттардың тактикалық-техникалық сипаттамаларын білетін, жұмыс тәжірибесі бар «Оңтүстік» өңірлік қолбасшылығының инженерлік бөлімшелерінің әскери қызметшілері кірді. Бірақ күн сайын әскери қызметшілермен қауіпсіздік шараларын сақтау бойынша сабақтар өткізіледі, – деп атап өтті инженерлік-саперлік батальон командирі, майор Жандос Байғожин.
Аумақты оқ-дәрі сынықтарынан толықтау тазарту және оларды кәдеге жарату жөніндегі іс-шаралар «Қауіпсіз ел» ұлттық жобасы және Қазақстан Президентінің оқ-дәрілерді қауіпсіз сақтауды қамтамасыз ету жөніндегі тапсырмаларын іске асыру шеңберінде жүргізіледі.
Жамбыл облысы Байзақ ауданындағы оқ-дәрі қоймасында болған оқиғаның салдарын жою жұмыстары ағымдағы жылдың қараша айының соңына дейін жалғасады.
Арайлы Жақсылық
