ЖАМБЫЛДЫҚ ОҚУШЫЛАР 7-ШІ ЖЫЛ ҚАТАРЫНАН «ЕҢ ҮЗДІК КОМАНДА» НОМИНАЦИЯСЫНЫҢ ИЕГЕРІ АТАНЫП КЕЛЕДІ
Ағымдағы жылдың наурыз айының 15 мен 20 күндері аралығында Атырау қаласында өткен республикалық жалпы білім беретін пәндер бойынша олимпиадаға Жамбыл облысынан 46 оқушы қатысып, 5 алтын, 7 күміс, 15 қола медальдармен марапатталды.
Білімділер сайысында оқушылар математика, физика, химия, биология, география және информатика пәндерінен сынға түсті. Сыннан сүрінбей, мыңнан оза шапқан жамбылдық оқушылар 7-ші жыл қатарынан өздерінің үздік екендерін дәлелдеп келеді. Биылғы жылы да жамбылдық оқушылар «Ең Үздік команда-2018» номинациясының иегері атанып, командалық есепте І орынды жеңіп алды.
Республикалық олимпиадаға қатысып, жүлделі орындардан көрінген жамбылдық оқушыларды облыстық білім басқармасы басшысының орынбасары Жамилә Елеуқызы, мектеп директорлары мен оқушылардың ата-аналары үлкен құрметпен күтіп алды.
Айта кететін жайт, аталған республикалық додаға еліміздің 14 облысынан, Астана, Алматы қалаларынан, республикалық білім беру ұйымдарынан және Назарбаев зияткерлік мектебінен 800 жуық оқушы қатысты.
