Тараздан елордаға автокеруен аттанды. Керуен құрамында жергілікті ауыл шаруашылығы тауар өндірушілерінің тауарлары тиелген он үлкен жүк автомобилі бар. 12-13 қыркүйек аралығында «Хан шатыр» сауда ойын — сауық орталығы жанындағы алаңда өтетін жәрмеңке барысында Жамбыл өнімдері сатылатын болады.
Жамбылдықтар елорда тұрғындарына құны 320 миллион теңге болатын 282,6 тонна азық-түлік өнімдерін ұсынбақ. Тоңазытқыштармен жабдықталған автокөліктермен елордаға ет, балық, шұжық, сүт, кондитерлік және макарон өнімдері, өсімдік майы, бал, кептірілген жемістер мен көкөністер жеткізілмек. Олардың бәрі нарық бағасынан 10-20 пайызға төмен бағада сатылатын болады. Өнімдерді Жамбыл облысының 10 ауданы мен Тараз қаласынан 90 ауылшаруашылық тауар өндірушілері ұсынуда.
Т.Рысқұлов ауданынан астанаға «Подгорное» ЖК-нің құны 1,5 миллион теңгенің шұжық өнімдері жөнелтілген.
— Бұл өз өнімдерімізді ешқандай делдалдарсыз өткеруге, бәсекелестік ортаны зерделей түсуге жақсы мүмкіндік. Егер елордалықтар біздің өнімдерімізге жоғары сұраныс танытып жатса, онда ол жаққа өз тауарымызды тұрақты түрде жөнелтіп тұратын боламыз, — деді шұжық цехының басшысы Марина Ильиных.
Байзақ ауданының «Раушан» шаруа қожалығы Нұр-Сұлтанға қара өрік, алма, жылыжай қияры мен қызанақ, жүзім, ал Жамбыл ауданының «Аса — Даму» ЖШС-і бес мың дана жұмыртқа жіберген.
Жәрмеңкеде таластық «Аянұр» және «Айнар» шаруа қожалықтары екі тонна сиыр етін келісін 1700 теңгеден сатуды жоспарлап отыр. Айта кетейік, барлық өнімдер санитарлық-ветеринарлық талаптарға сәйкес келеді және тауардың сапасы мен шығуы туралы сертификаттарға ие.
Ауыл шаруашылығы басқармасы басшысының орынбасары Қайрат Амановтың айтуынша, ауылшаруашылық өнімдерінің жәрмеңкесі өңіраралық ынтымақтастықты дамыту мақсатында өткізілуде.
— Барлық азық-түлік тауарлары қол жетімді бағамен сатылатын болады. Біздің өнімдеріміз Нұр-Сұлтан тұрғындары арасында үлкен сұранысқа ие, — деп атап өтті ол.
Жалпы, жыл басынан бері жамбылдық ауылшаруашылық тауар өндірушілері 155 миллиард теңгенің өнімін өндірсе, оның 2,8 пайызы ет өнімдері, 1,9 пайызы сүт өнімдері, 1,7 пайызы жұмыртқа құрайды.
Жамбыл облысы әкімінің баспасөз қызметі
