Жыл басынан бері өткен жылдың осы мезгілімен салыстырғанда Жамбыл облыс бойынша алғаш анықталған туберкулез ауруы 234 жағдайдан 223 жағдайға төмендеді, оның ішінде тыныс алу органдары туберкулезі 215-тен 192-ге кеміді. 14 жасқа дейінгі балалар сырқаттанушылығы 9 жағдайға, жасөспірімдер арасында 10 жағдайға азайды.
Бұл туралы ӨКҚ баспасөз алаңында аймақтағы санитариялық- эпидемиологиялық бақылау департаменті басшысының орынбасары Муликова Неили айтты. Оның мәліметінше, бұл дерт туберкулезбен ауыратын науқас сөйлегенде, жөтелгенде, түшкіргенде, ауа тамшылары арқылы жұғады. Жұқтыру көзі – ауру адам, ірі, ұсақ мал, шошқа, мысық, ит, құс.
«Туберкулезбен ауыратын адамдардан, жануарлардан, құстардан бөлініп шығатын заттар топыраққа, суға, шаңға түсіп, жылдар бойы сақталады, сондықтан инфекция ауаны, шаңды жұтқанда, сүт өнімдерін, шикі сүтті пайдаланғанда жұғуы мүмкін. Бактериялар адам немесе жануар ағзасында тез көбейеді, өйткені олардың дамуы үшін адам денесінің жылуына сәйкес келетін температура қолайлы. Денеден тыс жерде микробтар көбеймейді, бірақ өміршеңдігін ұзақ уақыт сақтай алады. Туберкулезбен ауырған кезде адам ағзасының әртүрлі мүшелері: өкпе, бүйрек, ішек, сүйектер мен буындар, ми қабықшалары, көбіне өкпе зақымданады», — деп түсіндірді спикер.
Неили Орынбасарқызы туберкулез пайда болған отбасыларға үлкен зардап әкелетінін, ал мемлекет үлкен экономикалық шығындарға ұшырайтынын атап өтті, Өйткені мұнымен ауыратын науқастардың 75%-ы 20-40 жастағы жастар, яғни еңбекке қабілетті жастағы адамдар. Туберкулездің негізгі белгілері — екі аптадан аса жөтел, салмақ жоғалту, терлеу, кеудедегі ауырсыну, дене температурасының ұзақ жоғарылауы, жалпы әлсіздік, тез шаршау, қан түкіру. Егер сіздің отбасыңызда осы белгілері бар науқас болса, шұғыл түрде дәрігерге қаралу керек.
