Жамбыл политехникалық колледжінің студенттері Елбасының «Болашаққа бағдар: Рухани жаңғыру» бағдарламалық мақаласы аясында дөңгелек үстелде бас қосты.
Ағымдағы жылдың басында Мемлекет басшысы «Болашаққа бағдар: Рухани жаңғыру» атты бағдарламалық мақаласын жариялаған болатын. Аталған мақалада ойды жеткізудегі ерекше мәнерлілік, дәлдік пен қарапайымдық көрініс тапқан. Сондай-ақ бұл еңбек мейлінше ауқымдылығымен, ой ұшқырлығымен ерекшеленеді. Еліміздегі рухани жаңғырудың маңыздылығы мен мәнін түсіну үшін қарапайым халық түсінетін, баршаға ұғынықты, бай әрі ықшам тілмен жеткізілген. Биылғы жылдан бастап Қазақстан жаһандық бәсекеге қабілеттілікке қол жеткізуге бағытталған еліміздің үшінші жаңғыруын іске асыруға кіріскені баршаға белгілі. Оның басты мақсаты – Ұлт жоспарын орындау аясында әлемнің ең озық 30 елінің қатарына кіру болып табылады. Әлбетте, саяси және экономикалық жаңғырудың жетістігі, бірінші кезекте, рухани қатынастар басымдық алатын қоғамдық сананың деңгейіне байланысты болмақ. Сондықтан, бүгінгі таңда рухани жаңғыру ең өзекті міндеттердің алдыңғы қатарына шығып отыр.
Елбасының көреген саясаты арқылы еліміздің дамуы үшін қажетті мақсаттарды жыл сайынғы жолдаулар айқындап береді. «Болашаққа бағдар: Рухани жаңғыру» атты мақаласы осыған дәлел. Аталған мақаладағы бағдарламалар іске асыру бойынша өткен шараға облыс әкімдігі білім басқармасының тәрбие бөлімінің бас маманы Сәуле Жұмалиева мен өңірге танымал блогер, «Тұранинфо» сайтының бас редакторы Исламбек Дастан қатысты. Алдымен сөз алған Исламбек Дастан «Цифрлы Қазақстан» бағдарламасы бойынша кеңінен мәліметтер келтіріп, қазіргі біздің қоғам заман көшінен қалмау керектігін жеткізді. Оның әуелгісі интеркентке қолжетімділік. Осы бағытта әңгіме өрбіткен ол интернетті қолдана білу жөнінде өзінің білгенімен бөлісті. Сондай-ақ блогер болудың қоғамға пайдасы туралы да айтып берді. Мұнан соң сөз кезегін алған Сәуле Дәуренбайқызы Елбасының мақаласы аясында аталған оқу орнында «Зерде» орталығы ашылғандығын және білім басқармасының тарапынан 30 жоба қабылданғандығын тілге тиек етті. Оның 5 жобасы тікелей студенттерге қатыс екен. Сонымен қатар осы бағытта колледжде факультативтік пәндер енгізіліп, оқытылып жатыр. Бұл сабақтардың мақсаты студенттердің туған еліне деген сүйіспеншілігін арттыру болып табылады екен.
Шара соңыда студенттер спикерлерге көкейлеріндегі сұрақтарды қойып, тұшымды жауаптар алды.
