Сарысу аудандық полиция бөлімінің қызметкерлері 17 қыркүйек күні түнгі уақытта Жаңатас қаласындағы жанармай құю бекетінің маңында авариялық жағдай туғызатын дрифт жасаған BMW-530 маркалы автокөлігінің жүргізушісін ұстады.
28 жастағы Алматы облысының тұрғынына қатысты ҚР Әкімшілік құқық бұзушылық туралы кодекстің 606, 590, 620 және 630-баптары бойынша төрт xаттама толтырылды.
— Кейбір жастарымыз қызық көріп, көпшіліктің назарын өзіне аудару үшін түрлі заңсыздықтарға барып жатады. Алайда, оның соңы үлкен келеңсіздіктерге, тіпті қайғылы оқиғаларға әкеп соғатынын ескермейді.
Қаламызға қонаққа келген BMW автокөлігінің жүргізушісі тура жанармай құю бекетінің жанында дрифт жасап, өте қауіпті әрі өрескел бұзушылыққа барған. Ол — көліктің қызып кетуінен тұтануы немесе рөлге ие бола алмай жанармай бекетіне соқтығысу қаупі туралы мүлде ойламаған. Полицейлер түнгі патрульдеу барысында кес-кестеп шеңбер жасап жол жабындыларын зақымдап жатқан дрифтті дер кезінде байқап, тиісті шара қабылдады. Түсіндіру жұмыстарынан соң ол өз қателігін түсініп, қайталамауға уәде берді — дейді Сарысу аудандық полиция бөлімінің бастығы Асxат Алметов.
