Іс-шараны облыстық Полиция департаментінің қызметкерлері Жастар ресурстық орталығының өкілдерімен бірлесіп өткізді. Акция барысында алыс жолға шығатын жүргізушілерге ұзақ сапар кезінде қауіпсіздік талаптарын сақтау, көлік басқару кезінде сергек болу және жол ережелерін қатаң ұстану қажеттігі түсіндірілді.
Жүргізушілерге ұйқышылдықтың алдын алуға арналған арнайы «Антисон» құрылғылары табысталып, салқын ауызсу ұсынылды. Сонымен қатар жолдағы қауіпсіздік ережелері жазылған ақпараттық жадынамалар таратылды.
Жамбыл облысы Полиция департаменті патрульдік полиция батальонының командирі Роллан Қуанышбаевтың айтуынша, жол-көлік оқиғаларының алдын алуда жүргізушінің физикалық жағдайы маңызды рөл атқарады.
– Жолға шығар алдында жүргізуші ең алдымен жақсылап демалып алуы керек. Шаршау немесе ұйқышылдық сезілсе, көлікті қауіпсіз жерге тоқтатып, міндетті түрде үзіліс жасаған жөн. Себебі жол қозғалысына қатысушы әрбір адам өз қауіпсіздігімен қатар, басқа адамдардың өмірі мен денсаулығына да жауапты, – деді ол.
Мамандардың айтуынша, көлік басқару кезіндегі шаршау адамның реакция жылдамдығын төмендетіп, жол жағдайын дұрыс бағалау қабілетіне әсер етеді. Сондықтан ұзақ сапарларда уақытылы тынығу – жолдағы қауіптің алдын алудың тиімді жолдарының бірі.
Акцияның басты мақсаты – жүргізушілердің жол мәдениетін қалыптастыру, қауіпсіздік талаптарын насихаттау және жол-көлік оқиғаларының санын азайту.
Полиция қызметкерлері жүргізушілерді жол ережелерін сақтауға, сапар алдында өз жағдайына жауапкершілікпен қарауға және жол қауіпсіздігін ортақ міндет ретінде қабылдауға шақырды.
Ақпарат Жамбыл облысы әкімдігі ақпарат және қоғамдық даму басқармасы мемлекеттік ақпараттық саясат тапсырысы негізінде жарияланды
