Алдымен Талас ауданына қарасты “Ойтал” ауылдық мәдениет үйінде “Менің құқықтарым – менің міндетім” тақырыбында ауыл тұрғындарымен кездесу өтті. Шараның мақсаты – азаматтардың құқықтары мен міндеттері туралы түсінігін кеңейту, заңға құрметпен қарау дағдыларын қалыптастыру және азаматтық жауапкершілікті арттыру. Кездесуде модератор, “Жамбыл облысы жастар ұйымдарының Қауымдастығы” ЗТБ президенті Еркін Әбдиев қатысушыларға сәлем жолдап, жиынның мазмұнымен таныстырды. Ал Жамбыл облысы заңгерлер палатасының мүшесі Раушан Ескермесова Конституцияда бекітілген негізгі құқықтар мен бостандықтар туралы баяндап, әрбір азаматтың қоғам алдындағы міндеттері – заңды сақтау, өзгелердің құқықтарын құрметтеу, табиғатты қорғау және Отанды сүю екендігін атап өтті. Ол қатысушыларды белсенді пікір алмасуға шақырып, құқықтық мәдениетті бірлесіп көтеру қажеттігін жеткізді.
Осы күні “Әлжан ана” ауылында “Құқықтық сауаттылық – әділ қоғам негізі” тақырыбында тағы бір кең көлемді іс-шара өтті. Мұнда құқықтық білім беру, заң бұзушылықтың алдын алу және жастардың азаматтық жауапкершілігін арттыру мәселелері талқыланды. Еркін Әбдиев сөзінде әрбір азаматтың құқықтық сауаттылығы қоғамның тұрақтылығы мен әділетті дамуының кепілі екенін атап өтті. Шара барысында заңгер Раушан Ескермесова Конституцияда бекітілген негізгі құқықтар мен міндеттерге тоқталып, әсіресе жастардың білім алу, еңбек ету, жеке басының қауіпсіздігі және сөз бостандығы құқықтары кеңінен түсіндірілді. Сонымен қатар, заңға бағыну, салық төлеу, басқа азаматтардың құқықтарын құрметтеу және Отанды қорғау секілді міндеттердің маңыздылығы да жан-жақты ашып көрсетілді. Жиынға қатысқан жастар өз сауалдарын қойып, еңбек құқықтары мен тұрмыстық құқық бұзушылықтардың алдын алу тақырыбында мазмұнды пікір алмасты.
Сол күні Қордай ауданында “Пробация есебіндегі азаматтармен кездесу” өтті. Іс-шара пробация қызметіндегі азаматтарға құқықтары мен міндеттері жөнінде толық ақпарат беру, мемлекеттік қолдау шараларын таныстыру және әлеуметтік бейімделу мүмкіндіктерін түсіндіруге арналды. Еркін Әбдиев ауыл тұрғындары мен пробация есебінде тұрған азаматтарға пробацияның мәні мен тәртібін түсіндіріп, мемлекет тарапынан көрсетілетін әлеуметтік қолдау құралдары туралы айтты. Ал заңгер Раушан Ескермесова пробацияның сот үкімі негізінде азаматқа бас бостандығынан айырмай, бақылау шараларын қолдану екенін түсіндіріп, еңбекке орналасу мен кәсіптік дағдыларды дамыту жолдары жайлы мәлімет берді. Кездесуде мамандар құқықтық кеңестер ұсынып, қатысушылардың сұрақтарына жауап берді.
Жалпы алғанда, аталған іс-шаралар азаматтардың құқықтық сауаттылығын арттыруға, заңға деген құрметті қалыптастыруға және қоғамда құқықтық мәдениетті нығайтуға ықпал етті. Қатысушылардың пікірінше, мұндай кездесулер қоғамдағы әділеттілікті нығайтып қана қоймай, азаматтардың құқықтарын қорғауға және заң бұзушылықтардың алдын алуға зор үлес қосады.
Ақпарат Жамбыл облысы әкімдігінің ақпарат және қоғамдық даму басқармасының мемлекеттік ақпараттық тапсырыс негізінде жарияланды
