Халықтың мәдениетін арттырып, ұлттық өнерімізді өркендетуге үлес қосып отырған облыс көлеміндегі мәдениет, архив мекемелерінің саны 524 (2018 жылы 549 болған – 11 клуб, 14 кітапхана жабылды). Оның 26-сы басқармаға қарайды, қалған 498-і Тараз қаласы мен аудан әкімдіктеріне бағынысты. Оның ішінде 190 мәдениет үйлері мен клуб мекемелері, 274 кітапхана, 2 облыстық драма театрлары, облыстық филармония, 2 кинотеатр, 8 музей, облыстық халық шығармашылығы орталығы, облыстық кино орталығы, тарихи-мәдени ескерткіштерді қорғау және қалпына келтіру дирекциясы, 12 архив мекемелері.
2019 жылы мәдениет саласын қаржыландыруға 5,4 млрд.теңге бөлінді, 2019 жылдың 1 шілдесіне 3,2 млрд. теңге игерілді. Ағымдағы жылы 9 мамыр – Ұлы жеңіс күніне орай «Даңқ» залы ашылып, ел игілігіне қолданысқа берілді. Жамбыл облысы бойынша елді мекендерді мәдениет нысандарымен қамту және олардың халыққа қызмет көрсету деңгейін арттыру картасына сәйкес 2019-2021 жылдары 26 елді мекенде клуб ғимараттарын соғу жоспарлануда (2019 ж. — 8, 2020 ж. — 8, 2021 ж. — 10).
Көне қаланың тарихи кескінін қайта жаңғыртып, туристердің назарын аудару мақсатында шығыстық үлгіде «Шахристан» этно-тарихи кешенінің құрылысы қарқынды жүргізілуде. Онда «Руханият және тарихтану» орталығы, тарихи-өлкетану музейі, көрме орталығы, көркемсурет галереясы, амфитеатр, жергілікті қолөнершілердің шеберханасы, т.б. нысандар орналасатын болады.
Сондай-ақ, «Тектұрмас» тарихи-этнографиялық кешені салынып, онда ортағасырлық үлгідегі қорғаныс бекінісі тұрғызылып, өткен ғасырларда облыс аумағында болған ірі тарихи оқиғалардың панорамасы көрініс табатын болады. Атап айтқанда, ислам дінінің Орталық Азияға тарауында шешуші рөл атқарған Атлах шайқасының, тәуелсіздігімізді сақтап қалуда ерекше орны бар Аңырақай шайқасының және Қазақ хандығының алғаш туы тігілген Қозыбасыдағы салтанатты сәттердің көріністері де айшықталады.
Тектұрмастың ең биік шоқысынан «Әулиеатаның» тұлғалық ескерткіші орнатылып, ескерткішке апарар баспалдақтың екі жағында Түрік қағандарының аты-жөні жазылған тас тұғырлар орнатылады.
Облыстың 80 жылдығы қарсаңында облыстық қазақ драма театрының алдына А.Тоқпановтың, «Баласағұн» орталық концерт залының алдына К.Әзірбаевтың ескерткіштерін орнату, «Тараз арена» спорт кешенінің алдына «Спорт саңлақтарының» аллеясын, Ы.Дүкенұлы атындағы қалалық мәдениет үйінің жанындағы саябақта «Өнер жұлдыздары» аллеясын ашуды жоспарлап отырғаны бәрімізді қуантты. Облыс атын иеленген Жамбыл бабамыздың жеке музейін ашу да өңір үшін үлкен абыройлы іс болмақ.
TURANINFO.KZ
