Өңірдегі тіршіліктің қазанында қайнаған Талас ауданы, Ойық ауылы тұрғындарының тынымды тірліктері көз қуантпай қоймайды. Биыл ғана ашылса да елдің берекесін арттырып жүрген «Береке» шаруақожалығы бос жатқан жерлерді игеріп, егін ісіне білек сыбана кірісіп кеткен.
Шаруа қожалығының төрағасы Нұркен Тұраров 20 гектар жерге жоңышқа, жүгері және көкөніс егіп, 9 гектарды қауын мен қарбыз бақшасына айналдырмақ.
Бүгінде шаруалар диқаншылыққа жаңа технологияларды да қолдана бастаған. Жоңышқа алқабын жаңбырлатып суғаратын «Bauer» құрылғысы артезианнан шыққан суды үнемдеумен қатар, егістіктің барлық бөлігіне су шашады. Ал жүгері мен көкөніс және бақша өнімдеріне дихандар тамшылатып суару әдісін қолданады.
Егістік өнім берген кезде ауыл тұрғындарына және Тараз қаласына тиімді бағамен саудалау көзделуде. Шаруа қожалығының төрағасы алдағы уақытта мемлекеттік субсидияларға құжат жинап, бастаған ісін ары қарай дөңгелетпек.
Өңірлік коммуникациялар қызметі
