Бұл бастама жергілікті қоғамдастықтың белсенділігін арттырып, ауыл тұрғындарының өмір сапасын жақсартуға бағытталған маңызды жоба болып саналады.
Грант аясындағы жобаның басты мақсаты – Үлгілі ауылының тұрғындарын әлеуметтік маңызды мәселелерді шешуге тарту арқылы ауыл инфрақұрылымын жақсарту және өмір сүру деңгейін арттыру. Жоба ауыл азаматтарының өз идеяларын іске асыруға мүмкіндік беретін ресурстар мен құралдарды ұсыну арқылы жергілікті қауымдастықтың дамуына ықпал етуді көздейді.
Аталған грант Жамбыл облысында өтетін XII өңірлік Азаматтық форум шеңберінде ұсынылып отыр. «Мықты қоғам – қуатты Қазақстан» ұранымен өтетін бұл форумның негізгі тақырыбы – ауылдық жерлердегі азаматтық белсенділікті қолдау және үкіметтік емес ұйымдардың әлеуетін арттыру.
Жоба шеңберінде кемінде 50 тұрғынның қатысуымен қоғамдық пікірталас ұйымдастырылып, ауылдағы нақты бір әлеуметтік мәселені шешуге бағытталған бастама таңдалады. Бұл, мысалы, қоғамдық демалыс орны не балалар алаңын абаттандыру жобасы болуы мүмкін. Жоба нәтижесінде жүзеге асырылған нысан кейін жергілікті атқарушы органның балансына беріледі.
Сонымен қатар, кемінде 30 белсенді тұрғынға арналған арнайы оқыту бағдарламасы жүргізіледі. Бұл шара азаматтық бастамаларды әзірлеу және жүзеге асыру бойынша қатысушылардың білімін арттыруға бағытталған. Жалпы жобаның іске асырылу мерзімі үш айдан кем болмауы тиіс және 2025 жылдың 30 қарашасына дейін аяқталуы қажет.
Айта кету керек, мемлекеттік емес гранттар – бұл мемлекеттің емес, жеке қорлар, қайырымдылық ұйымдар, жекелеген азаматтар немесе шетелдік донорлар тарапынан ұсынылатын қаржылай қолдау. Олар үкіметтік емес ұйымдарға қоғамдағы маңызды әлеуметтік мәселелерді шешуге бағытталған жобаларды іске асыруға мүмкіндік береді.
Мұндай бастамалар 2021 жылдан бері Жамбыл облысында табысты жүзеге асып келеді. 2021–2023 жылдар аралығында жалпы саны 26 грант бөлінген. Бұл – азаматтық қоғамды дамытуда мемлекеттік емес гранттар тетігінің тиімділігі мен қажеттілігін көрсететін нақты дәлел.
