Жамбыл облысы прокуроры болып тағайындалған Берік Әбіловтің қызметіне 115 күн өтті. Бұл — жаңа басшының тек уәде емес, нақты ісімен бағаланатын кезеңі. Алайда осы уақыт ішінде қоғам күткен серпіліс байқалды ма?

Анықтама. Берік Рахатұлы Әбілов, 05.06.1971 жылы туған, Талдықорған облысы Жаркент қаласының тумасы. 1993 жылы Әл-Фараби атындағы Қазақ ұлттық университетін «Құқықтану» мамандығы бойынша бітірген. Қазақстан Республикасы Президентінің 2024 жылғы 6 мамырдағы №535 Жарлығымен 3-сыныпты мемлекеттік әділет кеңесшісі сыныптық шені берілді. Қызмет кезеңінде II дәрежелі «Айбын» (Доблесть) орденімен, І, ІІ және ІІІ дәрежелі «Мінсіз қызметі үшін» медальдарымен, «Прокуратура үздігі» төсбелгісімен, «Қазақстан Республикасының Конституциясына 25 жыл», «Қазақстан Республикасының Тәуелсіздігіне 30 жыл», «Қазақстан Республикасының прокуратурасына 30 жыл» мерейтойлық медальдарымен марапатталған.

Алғашқы айларда прокуратура қызметінің негізгі бағыты заңдылықты қамтамасыз ету, азаматтардың құқықтарын қорғау және мемлекеттік органдар қызметіне қадағалауды күшейтуге бағытталды.

Үнсіздік көп, ашықтық аз

Ресми есептерде «заңдылықты қамтамасыз ету», «қадағалауды күшейту» сияқты жалпылама тұжырымдар жеткілікті. Бірақ қоғамға түсінікті, нақты нәтижелер аз. Резонансты істер бойынша прокуратураның ашық позициясы сирек естіледі. Бұл жағдай «ашықтық» қағидасының формалды сипатта қалып отырғанын аңғартады.

Әлеуметтік әділеттілік – қағаз жүзінде ме?

Жер дауы, көпбалалы отбасылардың мәселесі, еңбек даулары мен бюджет қаржысының жұмсалуы секілді өткір тақырыптар облыс үшін өзекті. Алайда бұл бағытта түбегейлі шешімдер немесе жүйелі тексерулер туралы қоғамға жария етілген нақты ақпарат жоқ. Осал топтардың құқықтары қорғалды деген мәлімдемелер бар, бірақ нәтиже қайда?

Республика күніне орай прокуратура қызметкерлері арасында шағын футболдан облыстық турнир өтті

25 қазан – Республика күні  ұлттық мерекесіне орай Жамбыл облысы прокуратурасының қызметкерлері арасында салауатты өмір салтын насихаттау және ұжымдық бірлікті нығайту мақсатында шағын футболдан облыстық турнир өтті. Спорттық шараға барлығы 9 команда қатысты. Ойын қортындысы бойынша:

• 1-орынды – «Ардагерлер» командасы,
• 2-орынды – Облыс прокуратурасының Аппараты, №2 және №5 басқармаларының құрамасы,
• 3-орынды – «JTS United» (Жуалы, Талас, Сарысу аудандарының құрамасы) иеленді.

Іс-шараға облыс прокуроры Берік Әбілов қатысып, қызметкерлерді мерекемен құттықтап, ұжым арасында спортты одан әрі дамыту мен салауатты өмір салтын қалыптастырудың маңыздылығын атап өтті.

Жеңімпаз командалар облыс прокурорының кубоктары мен грамоталарымен марапатталды.

Жамбыл облысында прокуратурамен өткізілген алқа мәжілісінде қайталанған құқық бұзушылықтардың алдын алудың тиімділігі қаралды

Жамбыл облысының прокуроры Берік Әбіловтің төрағалығымен құқық қорғау және жергілікті атқарушы органдар басшыларының қатысуымен қылмыстың қайталануын азайту бойынша қабылданған шаралардың тиімділігі мәселесі бойынша алқа отырысы өтті.

Сотталғандарға әлеуметтік-құқықтық көмек көрсететін «FSM Social» платформасы негізінде цифрлық технологияларды қолданумен жұмыс істеудің жаңа форматы енгізілді.

«Пробация үйі» ашылды, 200 бірлік электронды басқару құрылғылары және 30 бірлік заманауи компьютерлер сатып алынды.

«Цифрлық отбасы картасы» сияқты құқық бұзушылықтың алдын алудың цифрлық құралдарын одан әрі жетілдіру, сондай-ақ құқық бұзушыларды автоматты түрде анықтау үшін интеллектуалды бейнебақылау камераларын пайдалану туралы келісімге қол жеткізілді.

Тараз қаласындағы “Mart” сауда орталығында “HALYQ ZANGERI” акциясы өтті.

Акцияның басты мақсаты — халықтың құқықтық сауаттылығын арттыру, азаматтарға тегін заң көмегін көрсету және мәселелерін шешуге ықпал ету.
Іс-шараға Жамбыл облысының прокуроры Берік Әбілов, құқық қорғау, жергілікті атқарушы, мемлекеттік органдардың басшылары мен адвокаттар, нотариустар және өзге де сала өкілдері қатысты.
Акция аясында 100-ден аса тұрғын әр түрлі мәселелер бойынша құқықтық көмектер мен кеңестер алды.

Жамбыл облысында прокуратура қызметкерлерімен сенбілік ұйымдастырылды

«Заң мен Тәртіп» принципін ілгерілету және «Таза Қазақстан» концепциясын жүзеге асыру аясында облыс прокуратурасының қызметкерлері қоршаған ортаны қорғау бойынша сенбілік өткізді. Іс-шараға облыс прокуроры Берік Әбілов және құрылымдық бөлімшелердің қызметкерлері қатысты.

Қайтарылған активтердің есебінен Жамбыл облысы Қараой ауылының тұрғындары ауыз сумен қамтамасыз етілді

Жамбыл облысы Талас ауданына қарасты Қараой ауылында прокуратура органдары қайтарған активтердің есебінен жүзеге асырылған ауызсу саласындағы әлеуметтік нысанның құрылысы аяқталды. Салтанатты ашылу рәсіміне облыс прокуроры Берік Әбілов, аудан әкімі, қоғамдық өкілдер, ауыл ақсақалдары мен құрметті тұрғындар қатысты.

Жамбыл облысы прокуратурасының алқасында азаматтардың құқықтарын қорғау мәселелері қаралды

Жамбыл облысының прокуроры Берік Әбіловтің төрағалығымен өткен алқа отырысында сотқа дейінгі тергеп-тексеру кезінде азаматтардың конституциялық құқықтарын қорғау және азаптаулардың алдын алу мәселелері талқыланды. Биыл прокурорлар қылмыстық қудалау органдарының қызметтік кабинеттерінен және уақытша ұстау изоляторларынан 30 азаматты босатты.

Жамбыл облысы прокуратурасының алқа отырысында 2025 жылдың жұмыс қорытындылары қаралды

Жамбыл облысының прокуроры Берік Әбіловтің төрағалығымен өткен алқа отырысында 2025 жылдың жұмыс қорытындылары қаралды.

Ағымдағы жылы прокуратура қоғамдағы заңдылық пен тәртіпті қамтамасыз етуге басымдық беріп, қадағалау қызметінде тиімді тәсілдерді қолданды.

Облыс прокуратурасы азаматтар мен бизнес субъектілерінің құқықтарын қорғауды, сондай-ақ құқық бұзушылықтардың алдын алуды қамтитын «Заң мен тәртіп» тұжырымдамасын іске асыру бағытында белсенді жұмыс жүргізді.

Облыс прокуроры Б.Әбілов қылмыстық-атқару жүйесі департаментінің №67 және №25 түзеу мекемелеріне жұмыс сапарымен барды

Сапар барысында облыс прокуроры сотталғандардың жазасын өтеу шарттарымен, олардың құқықтарының сақталу жай-күйімен, медициналық қамтамасыз етуді ұйымдастырумен, сондай-ақ жұмыспен қамту және әлеуметтік бейімдеу мәселелерімен танысты.

Қазіргі уақытта №25 түзеу мекемесінде 300-ден астам сотталғанды еңбекпен қамтуды қамтамасыз ететін 7 бизнес субъектісі жұмыс істейді.

Қылмыспен күрес: статистика бар, сенім жоқ

Қылмысқа қарсы күрес бойынша көрсеткіштер жақсарды деген ақпарат айтылғанымен, тұрғындардың қауіпсіздікке деген сенімі айтарлықтай артты деу қиын. Тұрмыстық зорлық-зомбылық, жасөспірімдер арасындағы құқықбұзушылық бұрынғыша өзекті. Бұл – алдын алу шараларының әлі де әлсіз екенін көрсетеді.

Кадрлық тәртіп пен жауапкершілік мәселесі

Прокуратура жүйесінде ішкі тәртіп күшейтілді дегенмен, қызметтік салғырттыққа қатысты ашық ақпарат жоқ. Жауапкершілік кімнен сұралды, қандай шешім қабылданды – бұл сұрақтар жауапсыз.

115 күн – мүмкіндік пе, әлде жіберілген уақыт па?

Әрине, 115 күн барлық мәселені шешуге жеткіліксіз. Бірақ дәл осы кезеңде басымдықтар анық көрінуі тиіс еді. Қазіргі көрініс – сақтық, формализм және қоғаммен диалогтың әлсіздігі.

Қорытынды

Берік Әбіловтің Жамбыл облысындағы қызметі әзірге сақ әрі байқалмайтын басқару стилімен сипатталады. Прокуратураның беделі тек есеппен емес, әділдікке қол жеткізген нақты істермен өлшенеді. Егер алдағы уақытта ашықтық пен батыл шешімдер болмаса, 115 күн тек есеп үшін өткен уақыт ретінде қалуы мүмкін.

TURANINFO.KZ