21 сәуір күні өткен кеңес отырысында бірқатар маңызды мәселелер қаралып, кеңестің алдағы бағыт-бағдары нақтыланды.
Отырыс барысында ҚР Мәдениет және ақпарат министрлігі жанындағы Қоғамдық кеңестердің Үйлестіру кеңесі әзірлеген Қоғамдық кеңес мүшелерінің қызметін бағалау әдістемесінің жобасы егжей-тегжейлі талқыланды. Бұл әдістеме қоғамдық кеңес мүшелерінің белсенділігін, тиімділігін, қоғамға ықпал ету мүмкіндігін нақты өлшеуге мүмкіндік береді. Әдістеме негізінде кеңестің қызмет салаларына қарай құрылған төрт тұрақты комиссияның жұмысын жүйелі түрде жүргізу жолдары да кеңінен сөз болды.
Жаңа әдістемеде енгізілген KPI (негізгі тиімділік көрсеткіштері) ұғымы – қоғамдық кеңес мүшесінің қызметтегі белсенділігін, өзіне жүктелген міндетті қаншалықты нәтижелі атқарғанын бағалауға бағытталған. Бұл көрсеткіштер өкілеттік мерзімінде кеңес жұмысының сапасы мен тиімділігін анықтауға негіз болады.
Сонымен қатар, Қоғамдық кеңес мүшелерінің мінез-құлқы мен этикалық нормаларына қатысты арнайы талаптар да қаралып, бұл ережелер Жамбыл облыстық Қоғамдық кеңесі туралы ресми құжатқа енгізу туралы бірауыздан қолдау тапты.
Кеңес отырысында 2025 жылға арналған жұмыс жоспарына енгізілген жаңа толықтырулар мен екінші тоқсанда жүзеге асырылатын қоғамдық бақылау нысандарына байланысты шаралар тізбегі таныстырылды. Бұл өз кезегінде қоғаммен тығыз байланыста жұмыс жүргізуге, жергілікті атқарушы органдардың қызметін бақылауға мүмкіндік береді.
Отырыс аясында қоғамдық мәні бар мәселелерді жан-жақты зерделеу үшін Қоғамдық кеңес жанынан құрылған тұрақты және уақытша жұмыс топтарының міндеттері де кеңінен талқыланды. Олар өңірдегі өзекті мәселелерді саралап, нақты ұсыныстар әзірлеу арқылы шешімдер қабылдауға ықпал етпек.
Қоғамдық кеңес төрағасы Дүйсенәлі Бықыбаев жиын соңында күн тәртібінде қаралған әрбір мәселенің маңыздылығына тоқталып, қоғамдық кеңестің бағалау тетіктерін енгізуі – «Халық үніне құлақ асатын мемлекет» қағидатын іске асырудағы маңызды қадам екенін айтты. Оның сөзінше, бұл бастама қоғам мен билік арасындағы ашық диалогты нығайтып, азаматтардың мемлекеттік шешімдерге қатысу мүмкіндігін кеңейтеді.
