Бүгін халықаралық қарттар күніне орай облыстық мәслихаттың экономика, бюджет, салық және жергілікті өзін-өзі басқару мәселелері жөніндегі тұрақты комиссияның төрайымы Фарида Жүнісова облыстық мәслихат атынан еңбек ардагері, халық ағарту ісінің үздігі, зейнеткер Накарякова Любовь Ивановнаны мерейлі мерекесімен құттықтап қайтты.
Еңбек ардагерінің шаңырағында болған облыстық мәслихат депутаты Любовь Ивановнаға зор денсаулық, ұзақ өмір, отбасына бақыт тілеп, арнайы естелік сыйлықтарын тарту етті.
Любовь Накарякова — Жуалы ауданы Қарабастау ауылында 1935 жылы 24 сәуірде дүниеге келген. 1957 жылы Абай атындағы Алматы педагогикалық институтын тәмамдап, еңбек жолын 1957 жылы Сарысу ауданында мектепте мұғалім болып бастаған. Әр жылдары жауапты қызметтер атқарып, Тараз қаласында мектеп директоры, білім бөлімінің меңгерушісі, Тараз қалалық партия комитетінің хатшысы, облыстық партия комитеті жанындағы марксизм-ленинизм университетінің ректоры болған. Бірнеше мерекелік медальдармен марапатталып,«Қазақ ССР халық ағарту ісінің үздігі» белгісінің иегері атанған.
Сексеннің сеңгіріне шығып, жасы тоқсанға таяса да сыры кетпеген қария өз кезегінде құрмет көрсетіп кішілік ізет жасаған мәслихат депутатына алғысын білдіріп, еліміз үшін бейбіт те берекелі ғұмыр тіледі .
