Шанхайда Қытайдың Бесінші халықаралық импорттық көрмесі (CITIE) басталды. Биыл көрмеге 145 ел қатысуда, Fortune 500 тізіміндегі 280-нен астам компания ұсынылған. Ашылу онлайн-режимде өтті, іс-шараға қазақстандық тараптан сауда және интеграция вице-министрі Қайрат Төребаев қатысты.
ҚР Сауда және интеграция министрлігі мен Қазақстанның сыртқы сауда палатасы ұйымдастырған қазақстандық павильонның тұсаукесері 2022 жылғы 5 қарашада өтті. Көрмеге қатысушыларға Премьер-Министрдің орынбасары – Қазақстанның сауда және интеграция министрі Серік Жұманғарин бейнебайланыс арқылы құттықтау сөз сөйледі. Сондай-ақ, қазақстандық павильонға келушілерді Қазақстанның Шанхайдағы Бас консулы Рахымжан Рахимов пен Ciie бюросы Бас директорының орынбасары Лю Фусюэ қарсы алды.
Қазақстан павильонында 25 қазақстандық кәсіпорынның сүт, кондитерлік, ұн тарту, майлы, алкогольсіз және басқа да өнімдерінің кең ассортименті ұсынылған — «DEP» ЖШС, «Султан Маркетинг» ЖШС, «Аралтұз» АҚ, «Казинтерпродукт» ЖШС, «Самади-2030» ЖШС , Rola -7 ЖШС, «Шатхабар ИП», «Топ Энерджи» ЖШС, «Снакхан» ЖШС, «Малу» ЖШС, «Даулет-Бекет» ЖШС, «Көкшетау минералды сулары» АҚ, «Нефис Групп» ЖШС, «Eurasia Invest» ЖШС, «SWEET IDEAS-KZ» ЖШС, «Delis» ЖШС, «Golden Camel Group» ЖШС, Асыл Spice center ЖШС, RG Brands ЖШС және т.б.
Жылы және достық атмосферада өткен Қазақстандық павильонның ашылу салтанатына CIIE Бюросының басшылығы, Шанхай қаласының халық үкіметі коммерция департаментінің басшылығы, Цзянси провинциясындағы Қытайдың халықаралық саудасына жәрдемдесу комитетінің басшылығы, 19-шы Азия ойындарының Ұйымдастыру комитетінің басшылығы, Шанхайда аккредиттелген шетелдік бас консулдықтардың, сондай-ақ Қытайдағы іскер топтар мен БАҚ өкілдері қатысты.
Көрмеге қатысушы Қытайдың мемлекеттік органдары мен кәсіпорындарының өкілдері Қазақстанмен сауда-экономикалық және инвестициялық ынтымақтастықты одан әрі дамытуға мүдделі екендіктерін білдірді.
5-ші Қытай халықаралық импорттық көрмесі China International Import Expo-CIIE) Ұлттық көрме және конференция орталығында (Шанхай қ.) 2022 жылдың 5-10 қарашасы аралығында өтуде. 5-ші CIIE шеңберінде Ұлттық көрме (онлайн форматта), коммерциялық көрме және 5-ші Хонцяо халықаралық экономикалық форумын өткізеді.
