Мойынқұм ауданында ауылдық елді мекендердің инфрақұрылымын дамыту және ветеринариялық қызметтің сапасын арттыру бағытындағы жұмыстар жүйелі түрде жалғасуда. Осы мақсатта Қылышбай ауылында жаңа ветеринариялық пункттің құрылысы жүргізілуде. Аталған нысанның құрылыс барысымен аудан әкімі Ермек Карентаев аудан әкімінің орынбасарымен бірге арнайы барып танысты.
Жұмыс сапары барысында аудан басшысы құрылыс алаңын аралап, нысанда атқарылып жатқан жұмыстардың орындалу қарқынына назар аударды. Сонымен қатар мердігер мекеме өкілдері мен жауапты мамандардың есебі тыңдалып, құрылыс жұмыстарының қазіргі жағдайы талқыланды.
Мамандардың мәліметінше, нысан құрылысы бекітілген жоспарға сәйкес жүргізілуде. Ветеринариялық пункт пайдалануға берілгеннен кейін ауыл тұрғындарына көрсетілетін ветеринариялық қызметтің қолжетімділігі артып, мал ауруларының алдын алу, диагностикалау және ветеринариялық бақылау жұмыстарын жүргізуге қолайлы жағдай жасалады.
Посмотреть эту публикацию в Instagram
Аудан әкімі құрылыс жұмыстарының сапасына ерекше көңіл бөліп, әрбір кезеңнің талапқа сай орындалуы қажеттігін атап өтті. Сондай-ақ нысанды белгіленген мерзімде аяқтап, пайдалануға беру міндеті жүктелді. Құрылыс барысында қолданылатын материалдардың сапасы, еңбек қауіпсіздігі талаптарының сақталуы және атқарылып жатқан жұмыстардың техникалық талаптарға сәйкестігі де назардан тыс қалмады.
Кездесу барысында анықталған бірқатар мәселелер бойынша жауапты тұлғаларға нақты тапсырмалар беріліп, туындаған түйткілдерді дер кезінде шешу қажеттігі айтылды. Сонымен қатар аудан әкімі құрылыс жұмыстарының әр кезеңі тұрақты бақылауда болуы тиіс екенін жеткізіп, жауапты бөлімдерге мониторинг жұмыстарын күшейтуді тапсырды.
Мал шаруашылығы аудан экономикасының негізгі салаларының бірі саналатын Мойынқұм өңірі үшін ветеринариялық қауіпсіздікті қамтамасыз ету аса маңызды. Сондықтан жаңа ветеринариялық пункттің ашылуы ауыл тұрғындары мен шаруа қожалықтарына көрсетілетін қызмет сапасын жақсартуға, ветеринариялық шараларды уақытылы ұйымдастыруға және төрт түліктің саулығын сақтауға оң әсерін тигізеді деп күтілуде.
Әлеуметтік және өндірістік маңызы бар нысандардың сапалы әрі уақытылы аяқталуын қамтамасыз ету аудан басшылығының тұрақты назарында. Қылышбай ауылындағы ветеринариялық пункттің құрылысы да осы бағыттағы маңызды жобалардың бірі болып саналады. Нысан толық іске қосылғаннан кейін ауылдың ветеринариялық инфрақұрылымы нығайып, тұрғындарға көрсетілетін қызмет сапасы жаңа деңгейге көтеріледі.
