Шу ауданында облыс прокуроры Нұрғалым Әбдіровтың төрағалығымен көшпелі мекемеаралық мәжіліс өткізіліп, онда Мойынқұм, Шу және Қордай аудандарындағы құқықтық тәртіп пен қылмыстық ахуалдың жай-күйі қаралып, жастар арасындағы топтық бұзақылықтарға ерекше назар аударылды. Мойынқұм ауданында қылмыстың жекелеген түрлерінің азайғанына қарамастан, профилактикалық жұмыстардың төмендеуіне полиция қызметкерлері санының жетіспеушілігі, адам көп жиналатын орындарда бейнебақылау камераларының жоқтығы және басқа да бірқатар факторлардың айтарлықтай әсер еткені анықталған. Осыған байланысты полицияға жедел құрамды күшейту, учаскелік полиция қызметінің жұмысын жақсарту, әсіресе жекелеген ауылдар мен аудандарда профилактикалық жұмыстарды жандандыру тапсырылды. Жергілікті атқарушы органдарға азаматтар көп жиналатын орындарда бейнебақылау камераларының санын көйбейту ұсынылды. Одан бөлек, көлеңкелі экономика және жер қойнауын заңсыз пайдаланумен күреске назар аударылады. Жер қойнауын заңсыз пайдаланудың жолын кесу бағытында жұмыстардың жүргізіліп жатқанын атап өту қажет. Мысалы, ағымдағы жылдың мамыр айында облыс прокуратурасының үйлестіруімен «Ақбақай» кен орнында жүйелі түрде заңсыз қызметпен айналысқан ұйымдасқан қылмыстық топтың жолы кесілді. Күдікті тұлғалар ұсталды. Қазіргі уақытта сотқа дейінгі тергеу амалдары жүргізілуде. Облыс прокурорымен ІІО, ҰҚК-нің аумақтық бөлімшелері мен уәкілетті мемлекеттік органдардың басшыларына өзара мекемеаралық іс-қимылды жандандырып, жедел ақпарат алмасу, заңсыз көріністерді анықтау және жолын кесу бойынша шұғыл шаралар қабылдап, аудандарда профилактикалық жұмыстарды күшейту тапсырылды. Мекемеаралық жұмыс тобының құқық бұзушылықтарға ықпал ететін себептер мен жағдайларды терең талдау бойынша аралық нәтижелері тыңдалып, профилактикалық және жедел жұмыстарды ұйымдастырудағы жүйелі кемшіліктер анықталып, сондай-ақ оларды жою және жергілікті жерде бірлескен қызметтің тиімділігін арттыру бойынша ұсыныстар әзірленді. Анықталған заң бұзушылықтар бойынша облыс прокуратурасымен тиісті қадағалау актісі енгізілді.
Жамбыл облысы прокуратурасы
