Шу жол дистанциясының қызмет көрсету аумағында барлығы 8 теміржол өткелі орналасқан. Оның ішінде 2 теміржол өткелі кезекші қызметкермен күзетіледі, 6 теміржол өткелі кезекші қызметкерсіз жұмыс істейді. Аталған өткелдер Шу және Меркі аудандарының аумағында орналасқан.
Теміржол өткелдерінде қауіпсіздік талаптарын сақтамау ауыр зардаптарға әкелуі мүмкін. Бұған теміржол өткелінде орын алған соңғы жол-көлік оқиғасы дәлел. Атап айтқанда, 2026 жылғы 27 маусымда Аксенгир – Бурундай аралығындағы 4040 км, ПК-3 орналасқан күзетілетін реттелетін теміржол өткелінде автокөлік жүргізушісі өткелдің бағдаршамындағы тыйым салынған белгіге қарамастан, жабық шлагбаумды айналып өтіп, №26 «Шымкент – Алматы-2» жолаушылар пойызымен соқтығысқан.
Аталған жағдай теміржол өткелдерінен өту кезінде жол қозғалысы ережелерін қатаң сақтаудың қаншалықты маңызды екенін көрсетеді. Жүргізушілердің теміржол өткелдеріндегі тыйым салатын белгілерге бағынбауы, жабық шлагбаумды айналып өтуі және белгіленбеген жерлерден теміржол жолдарын кесіп өтуі адам өміріне қауіп төндіреді.
Осыған байланысты Шу жол дистанциясы тарапынан теміржол өткелдеріндегі қауіпсіздікті қамтамасыз ету мақсатында профилактикалық және түсіндіру жұмыстары тұрақты түрде жүргізілуде. Құқық қорғау органдарының қызметкерлерімен бірлесіп рейдтер ұйымдастырылып, автокөлік жүргізушілері мен жолаушыларға теміржол өткелдерінен өту тәртібі және қауіпсіздік талаптары түсіндірілуде.
Сонымен қатар, теміржол жолдарын белгіленбеген жерлерден кесіп өту фактілері бойынша тиісті шаралар қабылданып, анықталған құқық бұзушылықтар құзырлы органдар тарапынан рәсімделуде.
Теміржол өткелдеріндегі қауіпсіздік тек теміржол қызметкерлерінің ғана емес, барлық жол қозғалысына қатысушылардың ортақ жауапкершілігі. Әрбір жүргізуші мен жаяу жүргінші теміржол өткелінен өту кезінде белгіленген ережелерді қатаң сақтап, өз өмірі мен айналасындағы адамдардың қауіпсіздігіне жауапкершілікпен қарауы қажет.
Теміржол өткеліндегі бір сәттік немқұрайлылық орны толмас қайғыға әкелуі мүмкін. Қауіпсіздік ережесін сақтайық – адам өмірін қорғайық!
