Турнирге Ақтөбе, Түркістан, Петропавл және Тараз қалаларынан барлығы 8 команда қатысып, бес күн бойы өзара мықтыны анықтады. Дода жас спортшылар үшін тек бәсеке алаңы ғана емес, тәжірибе алмасып, достық қарым-қатынас орнатуға мүмкіндік берген маңызды шара болды.
Темірлан Арзымбетов – футболдағы шеберлігімен қатар, өмірдегі белсенділігімен де ерекшеленген тұлға. Ол банк саласында кәсіби біліктілігімен танылып, еңбекқорлығы мен жауапкершілігінің арқасында табысқа жеткен. Сонымен бірге, спортты серік етіп, футболдың дамуына үлес қосты. Жамбыл облысындағы «Тұран Әлем» банкінің құрамында ойнап, республикалық банктер арасындағы жарыстарда үш жыл қатарынан чемпион атанған. Сондай-ақ, облыстық ҰҚК, «Қазфосфат», «Дантист» және «Тұран Әлем» командаларында өнер көрсеткен. Ол әсіресе жасөспірімдерді тәрбиелеуге ерекше мән беріп, Аса мөлтек ауданындағы балаларды футболға баулып, спортқа деген қызығушылығын арттырды. Бүгінде оның еңбегі осындай турнирлер арқылы жалғасын табуда.
Жарыс қорытындысы бойынша финалда Түркістан облысы Түлкібас ауданынан келген команданы 1:0 есебімен жеңген Ақтөбе облысының командасы чемпион атанды. Түлкібастықтар екінші орынды иеленсе, Тараз қаласының «Ұлан-2012» командасы үшінші орынға тұрақтады.
Сонымен қатар, турнир барысында ерекше көзге түскен ойыншылар «Үздік ойыншы», «Үздік шабуылшы», «Үздік қорғаушы» және «Үздік қақпашы» номинациялары бойынша марапатталды. Жеңімпаздар мен жүлдегерлерге кубоктар мен бағалы сыйлықтар табыс етілді.
