️ Жамбыл облыстық тарихи-мәдени ескерткіштерді қорғау және қалпына келтіру дирекциясы «Таза Қазақстан» республикалық экологиялық акциясы аясында Қарасай және Қамыстыбұлақ шатқалындағы тарихи-мәдени мұра нысаны – қола дәуір мен ерте темір дәуіріне жататын петроглифтер орналасқан аумақта тазалық жұмыстарын ұйымдастырды.
Қарасай петроглифтері тарихи-мәдени мұра аумағында өткен тазалық жұмыстарына Тараз жастар ресурстық орталығынан 20-ға жуық белсенді волонтер жастары қатысты. Олар туған өлке тарихына деген құрмет пен елдік сананың жарқын үлгісін көрсетті.
Іс-шара барысында тарихи кешендер аумағында тазалық жұмыстары жүргізіліп, бұлақтың көзі ашылды. Дирекция директоры Сауран Қалиұлы жастарға тарихи-мәдени нысандарды көздің қарашығындай сақтау керектігін айтып, тазалық пен тәртіп – ұрпаққа деген жауапкершілікпен өлшенетін құндылық екенін ерекше атап өтті.
Бұл бастама жас буынға ұлттық құндылықтарды дәріптеуге, тарихи жәдігерлерге құрметпен қарауға үйретуге, сондай-ақ осындай қоғамға пайдалы игі істерге белсенді қатысуға жол ашады. Өткенге тағзым – қазіргі мен болашақты байланыстыратын алтын көпір.
Қарасай петроглифтері – Ақбұлым ауылынан оңтүстік-шығысқа қарай 5,7 шақырым жерде орналасқан, қола және ерте темір дәуіріне тән археологиялық ескерткіш. Бұл тарихи мұраны 2010 жылы «Археологическая экспертиза» ЖШС (С.Ақылбек, Ш.Құдабаев) ғылыми тұрғыда зерттеп, есепке алған.
Ал Қамыстыбұлақ шатқалы Қырғыз Алатауының теріскей бетінде орналасқан табиғи-тарихи кешен. Шатқал бес тау қыратынан тұрады. Ертеректе шатқал ішіндегі бұлақ суларынан құралған өзеннің төменгі ағысы шағын көлге айналып, оның маңында қамыс өсіп, осыған байланысты «Қамыстыбұлақ» атауы қалыптасқан. Бүгінде бұлақ көздері тартылып, шағын көлшік қана сақталған.
Жартастарда тауешкі, бұғы, елік, түйе, бұқа және адам бейнелері қашалып салынған. Әсіресе, бұқа мен түйе бейнелері ірі көлемде (60х40 см), нүктелеу техникасымен орындалғаны ерекше назар аудартады.
Мұндай құнды мұраларды сақтау – тек археологтардың емес, әрбір саналы азаматтың борышы. Бұл шара – жастарды патриоттық рухта тәрбиелеудің, тарихи мұраны қорғаудың және табиғатты аялаудың көрінісі болды.
